طالبان کی عوام کو اسلحہ اور سرکاری املاک فوری جمع کروانے کی ہدایت
شیئر کریں
افغان طالبان نے شہریوں کو سرکاری املاک، گاڑیاں اور اسلحہ متعلقہ اداروں کو جمع کروانے کی ہدایت کر دی ہے۔میڈیارپورٹس کے مطابق ترجمان طالبان ذبیح اللہ مجاہد کی جانب سے سوشل میڈیا پر جاری بیان میں کہا گیا کہ شہری سرکاری املاک، گاڑیاں اور اسلحہ ایک ہفتے میں جمع کروا دیں۔ذبیح اللہ مجاہد نے کہا کہ شہری سرکاری اشیا ایک ہفتے کے اندر اندر متعلقہ محکموں میں جمع کروا دیں تاکہ وہ کسی بھی قسم کی قانونی کارروائی سے بچ سکیں۔خیال رہے کہ اس سے قبل بھی طالبان نے دارالحکومت کابل میں شہریوں کو اسلحہ جمع کروانے کی ہدایت کرتے ہوئے کہا تھا کہ پہلے شہریوں نے اپنی حفاظت کے لیے اسلحہ رکھا ہوا تھا لیکن اب انہیں حفاظت کی ضرورت نہیں ہے کیونکہ ہم ان کی حفاظت کے لیے موجود ہیں۔ادھر18افغان اراکین پارلیمنٹ اور 7صوبوں کے گورنرز نے طالبان کی حمایت کا اعلان کردیا۔ طالبان رہنما کے مطابق حمایت کرنے والوں میں سابق صدر اشرف غنی کے بھائی حشمت غنی بھی شامل ہیں۔پاکستان میں افغانستان کے سابق سفیر عمر ذاخیلوال نے بھی طالبان کی حمایت کا اعلان کردیا ہے۔ افغان رہنما حامد گیلانی، اسحاق گیلانی، گل آغا شیرزئی، شیر محمد اخونزادہ اور حاجی دین محمد بھی طالبان کی حمایت کرنے والوں میں شامل ہیں۔ احمدزئی قبائل کی قومی شوری بھی طالبان کی حمایت کرنے والوں میں شامل ہے۔خیال رہے کہ اس سے قبل افغانستان کے جنوبی صوبے قندھار سے تعلق رکھنے والے وارلارڈ، قندھار اور ننگرہار صوبوں کے سابق گورنر گل آغا شیرزئی نے کابل میں طالبان کی حمایت کا اعلان کیا تھا۔طالبان کے مطابق افغانستان کا بلڈوزر کہلانے والے گل آغا شیرزئی اب اسلامی امارت کے ساتھی ہیں۔
