سندھ بلڈنگ، گلبرگ ٹاؤن میں غیرقانونی تعمیراتی دھندے جاری
شیئر کریں
ڈپٹی ڈائریکٹر عمران رضوی پر سنگین الزامات رہائشی علاقے میں کمرشل پلازہ تعمیر
افسر کے خلاف عوام برہم،ڈی جی مزمل حسین ہالیپوٹو سے فوری کارروائی کا مطالبہ
گلبرگ ٹاؤن کے معروف رہائشی علاقے شریف آباد میں سندھ بلڈنگ کنٹرول اتھارٹی کے ہی ڈپٹی ڈائریکٹر عمران رضوی پر غیرقانونی کمرشل تعمیرات کروانے کے سنگین الزامات سامنے آئے ہیں۔تفصیلات کے مطابق،ڈپٹی ڈائریکٹر عمران رضوی نے شریف آباد نمبر 1کے رہائشی علاقے میں واقع پلاٹ نمبر اے 76پر بغیر کسی منظور شدہ بلڈنگ پلان کے ایک تجارتی پلازہ تعمیر کرنا شروع کروا دیا ہے ، جو کہ بلڈنگ قوانین کی کھلی خلاف ورزی ہے ۔علاقہ مکین اس غیرقانونی عمل پر سخت برہم ہیں۔ مقامی رہائشی عبداللہ کا کہنا ہے کہ "یہ افسر خود عمارتوں کے قوانین کی نگرانی کرتا ہے ، لیکن آج وہی قوانین توڑ رہا ہے ۔ ہم نے ایس بی سی اے میں درخواستیں دیں، لیکن عمران رضوی کے عہدے کے باعث کوئی کارروائی نہیں ہوئی۔مقامی رہائشیوں نے سندھ حکومت اور ایس بی سی اے کے ڈائریکٹر جنرل مزمل حسین ہالیپوٹو سے فوری کارروائی کا مطالبہ کیا ہے ۔ انہوں نے کہا کہ اگر غیرقانونی تعمیرات کو فوری طور پر نہ گرایا گیا تو وہ سڑکوں پر احتجاج کرنے پر مجبور ہوں گے ۔واضح رہے کہ یہ پہلا موقع نہیں جب سندھ بلڈنگ کنٹرول اتھارٹی کے کسی افسر پر غیرقانونی تعمیرات میں ملوث ہونے کے الزامات لگے ہیں۔ شہری حلقوں کا کہنا ہے کہ اس طرح کے واقعات عوام کے اداروں پر سے اعتماد کو مجروح کرتے ہیں۔سندھ حکومت کے لیے ضروری ہے کہ وہ اس معاملے میں فوری اور غیرجانبدارانہ کارروائی کرے تاکہ عوام کے اعتماد کو بحال کیا جا سکے اور یہ واضح کیا جا سکے کہ قانون سے بالاتر کوئی نہیں۔
