مہنگی بجلی، اوپر سے ٹیکسز،جماعت اسلامی کا 28 اگست کو ملک گیر ہڑتال کا اعلان
شیئر کریں
امیر جماعت اسلامی حافظ نعیم الرحمان نے کہا ہے کہ خیرات نہیں حق مانگ رہے، پورے ملک میں بجلی کی قیمت کم کی جائے، حکومت سے معاہدے کی تمام شقوں پر عمل کرائیں گے۔ انہوں نے پریس کانفرنس کرتے ہوئے کہا کہ کراچی سے 90فیصد ٹیکس وصولیاں ہوتی ہیں، لیکن سندھ حکومت ریلیف دینے کو تیار نہیں، اگر پنجاب میں علامتی ریلیف ہی سہی اگر وہ کرسکتے ہیں تو سندھ حکومت کو کیوں ریلیف نہیں دے سکتی؟ خیرات نہیں حق مانگ رہے، پورے ملک میں بجلی کی قیمت کم کی جائے، حکومت سے معاہدے کی تمام شقوں پر عمل کرائیں گے، کاؤنٹ ڈاؤن جاری ہے ہم متحرک بھی رہیں گے، 28اگست کو مہنگائی کے خلاف ملک گیر ہڑتال کریں گے۔یاد رہے امیر جماعت اسلامی حافظ نعیم الرحمان نے مہنگی بجلی اور مہنگائی کے خلاف 28 اگست کو ملک گیر شٹر ڈاؤن ہڑتال کا اعلان کیا تھا اور ملتان میں جماعت اسلامی کے تحت منعقد جلسے سے خطاب کرتے ہوئے حافظ نعیم الرحمان نے کہا کہ تمام سیاسی جماعتوں کی حکومتوں نے عوام کو بجلی کے بھاری بلوں میں دبا دیا ہے، بجلی کے ان بلوں نے عوام کو بے حال کردیا، حکمرانوں کی مراعات اور عیاشیوں کے عوام اب متحمل نہیں ہوسکتے یہ شعور پھیل چکا ہے۔انہوں نے کہا کہ ہم حکومت سے معاہدہ کر کے گھر نہیں گئے، آج بھی اپنے مطالبات پر ڈٹے ہوئے ہیں اگر انہوں نے مطالبات نہ مانے تو پھر چاروں طرف سے عوام کے سمندر کے ساتھ اسلام ا?باد پہنچیں گے۔ حافظ نعیم نے کہا کہ آج انہوں نے 14 روپے فی یونٹ کمی کا اعلان کیا ہے، عوام دیکھ لے کہ بجلی کے حوالے سے کون کھڑا ہے اور کس کی جدوجہد کی وجہ سے یہ کمی ہوئی، بات کریڈٹ کی نہیں اگر یہ کسی کو لینا ہے تو لے مگر ہمیں مہنگی بجلی کسی صورت قبول نہیں ہے۔امیر جماعت اسلامی کا کہنا تھا کہ نواز شریف بجلی کی قیمت کم کرنے کا اعلان کر رہے ہیں تو شہباز شریف پورے ملک کو ریلیف کیوں نہیں دے سکتے؟ سود کی لعنت کو بتدریج ختم کر کے بجلی بلوں کے حوالے سے عوام کو ریلیف دیا جاسکتا ہے۔ اْن کا کہنا تھا کہ باجوہ کی ایکسٹینشن کے لئے تحریک انصاف ،ن لیگ، پیپلز پارٹی اور ایم کیو ایم ودیگر اکٹھے ہو جاتے ہیں تو عوامی ریلیف کے لئے کیوں نہیں ہوسکتے؟ اپنی مراعات اور عیاشیوں کو کم کرکے عوامی ریلیف دیا جاسکتا ہے۔حافظ نعیم الرحمان نے اعلان کیا کہ 37 دنوں میں اگر مطالبات پر کام نہ ہوا تو عوام ہماری کال پر لانگ مارچ کرتے ہوئے چاروں اطراف سے اسلام آباد پہنچیں گے، اب تمام طبقات کو ساتھ ملا کر تحریک اٹھائیں گے جو کسی سے نہیں رکے گی۔ شریفوں اور پیپلز پارٹی والوں سے کہتا ہوں کہ یہ نہ ہو کہ تمھیں ہیلی کاپٹر بھی نہ مل سکے، 28 اگست کو ملک گیر شٹرڈاؤن ہڑتال ہوگی۔
