اسلام آباد میں ممکنہ احتجاج، سندھ پولیس اسلام آباد پولیس کی مدد کیلئے طلب
شیئر کریں
ایک ایس پی ،چارڈی ایس پی اسٹیبلشمنٹ فراہم کرے گی ،پرنسپل پی ٹی سی شہداد پور علی جاکھرانی سندھ پولیس کی کمانڈ کریں گے
سندھ پولیس افرادی قوت کے علاوہ انسداد فسادات کے تمام آلات سے لیس ہوگی،ہر اہلکار کے پاس ہیلمٹ،شیلڈ اور ڈنڈا موجود ہوگا،ذرائع
کراچی(اسٹاف رپورٹر)اسلام آباد میں سیاسی جماعت کی جانب سے ممکنہ احتجاج کے باعث سندھ پولیس کو اسلام آباد پولیس کی مدد کے لیے طلب کرلیا گیاہے۔تفصیلات کے مطابق سندھ پولیس کو امن و امان کی صورتحال کنٹرول میں رکھنے کے لیے طلب کیا گیا ہے۔ سندھ پولیس اسلام آباد پولیس کی مکمل معاونت کرے گی۔پرنسپل پی ٹی سی شہداد پور علی شیر جاکھرانی سندھ پولیس کی کمانڈ کریں گے۔ ایک ایس پی ،4 ڈی ایس پی،ڈی آئی جی اسٹیبلشمنٹ کی جانب سے فراہم کیے جائیں گے۔پی ٹی سی شہداد پور سے 900 ٹرینی اور 125 ٹریننگ اسٹاف اسلام آباد بھیج دیا گیا۔مجموعی طور پر ایک ہزار 25 اہلکار شہداد پور سے اسلام آباد پہنچیں گے۔ڈی آئی جی شہید بے نظیر آباد، لاڑکانہ اور سکھر رینج اہلکاروں کی نقل و حرکت کے دوران مکمل سیکیورٹی فراہم کریں گے۔سندھ سے نکلنے تک مذکورہ ڈی آئی جیز کی سیکیورٹی ہوگی۔ تمام اہلکار سادہ لباس میں یونیفارم کے ہمراہ سفر کریں گے۔ سندھ پولیس افرادی قوت کے علاوہ انسداد فسادات کے تمام آلات سے لیس ہوگی۔ہر اہلکار کے پاس ہیلمٹ،شیلڈ اور ڈنڈا موجود ہوگا۔اہلکاروں کے پاس اینٹی رائٹ کٹ کے علاوہ شیل گن بھی ہوگی۔ شیل گن سے لیس اہلکاروں کے پاس 50 شیل بھی ہوں گے جبکہ مخصوص اہلکاروں کے پاس ایس ایم جی اور جی تھری رائفل بھی ہوں گی۔اے آئی جی لاجسٹک 2 ہزار لانگ رینج گیس شیل کی دستیابی یقینی بنائیں گے۔100 گیس گن ،ایک ہزار اینٹی رائٹ کٹ جس میں تمام آلات موجود ہوں کی دستیابی بھی لازمی ہوگی۔سندھ پولیس کو حکم نامے پر عمل درآمدکے لیے سختی سے ہدایت نامہ جاری کردیا گیا ہے۔
