پی ایس ایل ‘لاہور قلندرز نے سنسنی خیز مقابلے کے بعد اسلام آباد یونائیٹڈکوشکست دیدی
شیئر کریں
پاکستان سپر لیگ(پی ایس ایل) 2022 کے 12 ویں میچ میں لاہور قلندرز نے سنسنی خیز مقابلے کے بعد زمان خان کے شان دار آخری اوور کی بدولت اسلام آباد یونائیٹڈ کو 8 رنز سے شکست دے دی۔نیشنل اسٹیڈیم کراچی میں کھیلے گئے پی ایس ایل کے 12 ویں میچ میں اسلام آباد یونائیٹڈ کے کپتان شاداب خان نے ٹاس جیت کر پہلے فیلڈنگ کا فیصلہ کیا۔لاہور قلندرز کے اوپنرز نے ایک مرتبہ پھر بہترین آغاز کرتے ہوئے 7 اوورز میں 83 رنز بنائے۔عبداللہ شفیق 8 ویں اوور کی دوسری گیند پر آئوٹ ہونے والے پہلے بلے باز تھے، جنہوں نے 6 چوکوں اور ایک چھکے کی مدد سے 24 گیندوں پر 44 رنز کی اننگز کھیلی۔قلندرز کے دوسرے آٹ ہونے والے بلے باز کامران غلام تھے جو صرف 2 رنز بناسکے اور 86 کے مجموعے پر مبشر خان کی گیند پر منرو کو کیچ دے گئے۔رواں سیزن میں سنچری بنانے والے فخر زمان نے 27 گیندوں کا سامنا کیا اور38 رنز بنا کر 93 رنز کے مجموعی اسکور پر آٹ ہوئے، جو قلندرز کی تیسری وکٹ تھی۔محمد حفیظ 5 رنز بنا کر آئوٹ ہوئے تو قلندرز کا اسکور 97 رنز پر پہنچا تھا اور قلندرز کی 4 اہم وکٹیں گر چکی تھیں۔ایک اچھے آغاز کے بعد 100 رنز مکمل ہونے سے قبل ہی قلندرز کے 5 بلے باز آئوٹ ہوئے اور فل سالٹ 2 رنز بنا کر 98 کے اسکور پر پویلین سدھار گئے۔اس موقع پر ہیری بروک اور ڈیوڈ ویزے نے ٹیم کوسنبھالا اور اچھی شراکت قائم کرتے ہوئے اسکور 149 رنز تک پہنچایا۔ویزے 20 رنز بنا کر وقاص مقصود کی گیند پر وکٹ کیپر اعظم خان کا کیچ بنے۔ہیری بروک 26 گیندوں پر 5 چوکوں کی مدد سے 37رنز کی اننگز کھیل کر آخری اوور کی پہلی گیند پر آئوٹ ہونے والے ساتویں بلے باز تھے۔راشد خان نے دوسرے اینڈ سے آئوٹ ہوئے بغیر 15رنز بنائے۔کپتان شاہین شاہ آفریدی 4 رنز بنا کر آئوٹ ہوئے۔حارث رئوف صفر پر وقاص مقصود کی آخری وکٹ بن گئے۔لاہور قلندرز نے مقررہ 20 اوورز میں 9 وکٹوں پر 174 رنز بنائے۔اسلام آباد یونائیٹڈ کی جانب سے کپتان شاداب خان اور وقاص مقصود نے4،4 وکٹیں حاصل کیں۔یونائیٹڈ نے ہدف کا تعاقب شروع کیا تو پہلی وکٹ 16 رنز پر گری، جب الیکس ہیلز 11 رنز پر شاہین شاہ آفریدی کی گیند پر فخر زمان کو کیچ دے کر آئوٹ ہوئے۔پال اسٹرلنگ بھی بڑی اننگز نہیں کھیل سکے اور 10 گیندوں پر 2 چوکوں اور ایک چھکے کی مدد سے 14 رنز بنا کر 37 کے اسکور پر ٹیم کا ساتھ چھوڑ گئے۔کولن منرو اور شاداب خان نے تیسری وکٹ کی شراکت میں ٹیم کی پوزیشن مستحکم کی اور اس دوران منرو نے اپنی نصف سنچری بھی مکمل کی۔شاداب خان 32 گیندوں پر 2 چوکوں اور 4 چھکوں کی مدد سے 52 رنز بنا کر ٹیم کی پوزیشن مستحکم کرنے کے بعد 16 ویں اوور میں آئوٹ ہوئے۔کولن منرو نے 60 رنز کی اننگز کھیلی اور جب انہیں حارث رئوف نے آئوٹ کیا تو یونائیٹڈ کا اسکور 17 ویں اوور میں 140 رنز تھا۔قلندرز کے زمان خان نے آخری اوور میں آصف علی اور اعظم خان کو کھل کر کھیلنے کا موقع ہی نہیں دیا اور صرف 3 رنز کے عوض ایک وکٹ حاصل کرکے یونائیٹڈ کو 166 رنز تک محدود کردیا۔اسلام آباد یونائیٹڈ نے مقررہ اوورز میں 5 وکٹوں پر 166 رنز بنائے اور میچ میں 8 رنز سے شکست کا سامنا کرنا پڑا۔قلندرز کے زمان خان نے آخری اوور میں میچ کا پانسہ پلٹ دیا اور 3 رنز دے کر آصف علی جیسے جارح مزاج بلے باز کی وکٹ حاصل کرکے ٹیم کو شان دار فتح دلائی۔زمان خان کو میچ کا بہترین کھلاڑی قرار دیا گیا۔
