کے کے ایف کی ایمبولینس میں خاتون کے اغوا کی کوشش ناکام، پولیس نے 4ملزمان کو گرفتارکرلیا
شیئر کریں
کراچی کے علاقے اورنگی ٹائون میں فلاحی تنظیم خدمت خلق فائونڈیشن (کے کے ایف) کی ایمبولینس میں خاتون کے اغوا کی کوشش پولیس نے ناکام بنا کر چار ملزمان کو گرفتار کرلیاہے۔تفصیلات کے مطابق کراچی کے علا قے اورنگی ٹائون میں کے کے ایف کی ایمبولینس میں خاتون کو اغوا کرنے کی کوشش کی گئی ، پاکستان بازارپولیس نے اغوا، ٹیلی گراف ایکٹ کے تحت مقدمہ درج کرلیا ہے۔مقدمہ خاتون کے دیور کی مدعیت میں درج کیا گیا جبکہ مقدمے میں گرفتار4ملزمان اوران کے ساتھی کو نامزد کیا گیا ہے۔ایس ایس پی ویسٹ کے مطابق ملزمان خاتون کواورنگی ٹائون پاکستان بازار سے فلاحی تنظیم کی ایمبولینس کے ذریعے اغوا کی کوشش کر رہے تھے، بازیاب کرائی جانے والی خاتون اورنگی ٹائون بلال کالونی کی رہائشی ہے۔پولیس کے مطابق سنی نامی ملزم موبائل فون پرخاتون کودھمکیاں دیتا تھا، کے کے ایف کی ایمبولینس کے ڈرائیور نے 3ساتھیوں کے ساتھ خاتون کو گھرسے اغواکرنے کی کوشش کی، فوری کارروائی کرکے4 ملزمان کو گرفتارکرکے ایمبولینس کو تحویل میں لے لیا ہے۔گرفتار اغوا کاروں میں ضمیر ، فراز ، محمد ابراہیم اور محمود عالم شامل ہیں جبکہ ملزم سنی کی گرفتاری کیلئے چھاپے مارے جارہے ہیں۔
