جنگ ابھی ختم نہیں ہو گی، ایرانی وزیر خارجہ
شیئر کریں
ٹرمپ کون ہوتے ہیں ہمارے لیڈر کا انتخاب کرنے والے؟عباس قراقچی
ایرانی وزیر خارجہ عباس عراقچی نے اعلان کیا ہے کہ تہران اس وقت امریکہ اور اسرائیل کے ساتھ جنگ کے خاتمے پر بات چیت کے لیے تیار نہیں ہے۔
انہوں نے اس بات پر زور دیا کہ تہران سپریم لیڈر علی خامنہ ای کے جانشین کے انتخاب کے حوالے سے اپنے داخلی معاملات میں کسی کو مداخلت کی اجازت نہیں دیتا۔
عراقچی نے بتایا کہ اسرائیل اور امریکہ نے پہلے ہی اس جنگ بندی کی خلاف ورزی کی ہے جو گزشتہ سال 12 روزہ جنگ کے خاتمے کے لیے ہوئی تھی۔ انہوں نے مزید کہا کہ اب آپ دوبارہ جنگ بندی کا مطالبہ کرنا چاہتے ہیں؟ چیزیں اس طرح نہیں چلتیں۔
ایرانی وزیر خارجہ نے مزید کہا کہ جنگ کا مستقل خاتمہ ہونا چاہیے۔ جب تک ہم اس مرحلے تک نہیں پہنچتے، میرا خیال ہے کہ ہمیں اپنے عوام اور اپنی سلامتی کے لیے لڑائی جاری رکھنے کی ضرورت ہے۔
جہاں تک خلیجی ممالک پر ایران کے حملوں کا تعلق ہے انہوں نے اس بات کی تردید کی کہ ایران جان بوجھ کر اپنے پڑوسیوں پر حملہ کر رہا ہے۔ انہوں نے کہا کہ ہم امریکی اڈوں، تنصیبات اور مفادات پر حملہ کر رہے ہیں جو بدقسمتی سے ہمارے پڑوسیوں کی سرزمین پر واقع ہیں۔
ایرانی وزیر خارجہ نے اس بات پر بھی زور دیا کہ اگر واشنگٹن نے ایران میں زمینی افواج تعینات کیں تو ہمارے پاس سخت جاں سپاہی موجود ہیں جو اپنی سرزمین میں داخل ہونے والے کسی بھی دشمن کا انتظار کر رہے ہیں تاکہ وہ ان سے لڑیں، انہیں ختم کریں اور تباہ کر دیں۔
امریکی صدر ڈونلڈ ٹرمپ کے گزشتہ ہفتے کے ان بیانات کے بارے میں کہ جنگ شروع کرنے کی ایک وجہ یہ ہے کہ تہران جلد ہی ایسے میزائل حاصل کر لے گا جو امریکہ تک پہنچنے کی صلاحیت رکھتے ہوں گے، ایرانی وزیر خارجہ نے اس کی تردید کردی۔عراقچی نے کہا یہ سچ نہیں ہے۔
یہ دراصل گمراہ کن معلومات ہیں۔ جیسا کہ آپ جانتے ہیں، ہمارے پاس میزائل بنانے کی صلاحیت ہے لیکن ہم نے جان بوجھ کر خود کو 2000 کلومیٹر سے کم رینج تک محدود رکھا ہے کیونکہ ہم نہیں چاہتے کہ دنیا کی کسی بھی دوسری قوت کی جانب سے ہمیں خطرے کے طور پر دیکھا جائے۔
جب ٹرمپ کے بیانات کے بارے میں پوچھا گیا جس میں انہوں نے کہا تھا کہ انہیں اگلے ایرانی رہبر اعلی کے انتخاب میں حصہ لینا چاہیے تو عراقچی نے کہا کہ تہران علی خامنہ ای کے جانشین کے انتخاب کے حوالے سے اپنے داخلی معاملات میں کسی کو مداخلت کی اجازت نہیں دیتا۔
