سہیل آفریدی کی اسٹریٹ موومنٹ کی تیاری کرنے کی ہدایت
شیئر کریں
عمران خان کا حکم آئے تو تیاری ہونی چاہیے، ہمارے احتجاج میں ایک گملا تک نہیں ٹوٹا
ہمارے لیے لیڈر کا اشارہ کافی ، اسی دن لبیک کہا تھا، آئی ایس ایف کارکنان سے خطاب
وزیراعلیٰ خیبر پختونخوا محمد سہیل افریدی نے آئی ایس ایف کو اسٹریٹ موومنٹ کی تیاری کرنے کی ہدایت کردی، انہوں نے کہا کہ عمران خان کی طرف سے دوسرا حکم آئے تو مکمل تیاری ہونی چاہیٔے۔ وزیراعلیٰ سہیل آفریدی کی سماجی رابطے کی ویب سائٹ کے مطابق وزیراعلیٰ سہیل آفریدی نے آئی ایس ایف کارکنان سے خطاب کرتے ہوئے کہا کہ عمران خان کی جانب سے اسٹریٹ موومنٹ کی تیاری کی ہدایات ملتے ہی ہم نے عملی طور پر میدان میں نکل کر گلیوں اور بازاروں میں یہ پیغام دیا کہ ہمارے لیے لیڈر کا ایک اشارہ ہی کافی ہے، ہم نے اسی دن لبیک کہا تھا اور آج بھی قیادت کے ہر فیصلے پر ساتھ کھڑے ہیں۔آئین و قانون ہمیں پُرامن احتجاج کا حق دیتا ہے اور انشائاللہ ہم اس حق کو ضرور استعمال کریں گے۔جدوجہد انصاف اسٹوڈنٹ فیڈریشن کی بنیاد 14 نومبر 2007 کو مراد سعید نے رکھی، ہماری فیڈریشن کا ریکارڈ ہمیشہ پُرامن، آئینی اور قانونی جدوجہد پر قائم رہا ہے۔ انہوں نے کہا کہ ہم نے بے شمار دھرنے اور احتجاج کیے، مگر آج تک ہم سے ایک گملہ تک نہیں ٹوٹا۔مسئلہ وہاں پیدا ہوتا ہے جہاں پاکستان دشمن عناصر جمع ہوتے ہیں، جنہوں نے ہمیشہ اقتدار کی خاطر جمہوریت پر حملہ کیا، سپریم کورٹ پر حملہ کیا، اور سیاست میں نفرت، بدتمیزی اور غیر جمہوری کلچر متعارف کروایا۔ آپ سب نے اس وقت سٹریٹ موومنٹ کی تیاری پر پوری توجہ دینی ہے۔ اس کا پہلا مرحلہ یہ ہے کہ اپنی تمام تنظیمی ساخت کو مکمل اور منظم کیا جائے، کیونکہ سٹریٹ موومنٹ کی کامیابی سٹریٹ پاور سے ہی ممکن ہوتی ہے۔ہماری اصل طاقت یہ ہے کہ ہر ادارے، ہر کالج اور ہر یونیورسٹی میں ہماری تنظیمیں مکمل اور فعال ہوں۔ سہیل افریدی نے کہا کہ جب بھی ہمارے لیڈر عمران خان کی طرف سے دوسرا حکم آئے، ہم سب کو مکمل طور پر تیار ہونا چاہیے۔ یہ 15 دن میں بھی ہو سکتا ہے، 10 دن میں بھی یا ایک مہینے میں مگر ہماری کوشش یہ ہونی چاہیے کہ کم سے کم وقت میں اپنی تمام تر تیاری مکمل رکھیں۔ انصاف اسٹوڈنٹ فاؤنڈیشن کا بنیادی کام یہ ہے کہ کالجوں اور یونیورسٹیوں میں طلبہ کو عمران خان کے نظریے، وژن اور مستقبل کی سوچ سے آگاہ کیا جائے۔
