ملک بھر میں ایکس سروس کی آنکھ مچولی، ڈیڑھ گھنٹہ بحالی کے بعد دوبارہ متاثر
شیئر کریں
ملک میں سماجی رابطوں کی ویب سائٹ ایکس کی سروس (سابق ٹوئٹر)کچھ دیر بحال رہنے کے بعد دوبارہ متاثر ہوگئی ہے۔ملک بھر میں سوشل میڈیا پلیٹ فارم ایکس کی سروس کی آنکھ مچولی کا سلسلہ اتوار سے شروع ہوگیا تھا جو تاحال جاری ہے۔ آج صبح بھی کچھ دیر سروس بحال رہنے کے بعد ایک بار پھر بندش کا شکار ہے۔خیال رہے کہ پیر کی رات دیڑھ گھنٹہ بحالی کے بعد دوبارہ متاثر ہوگئی، اتوار کو بھی ایکس کی سروس آدھا گھنٹہ بحال ہونے کے بعد پھرڈاون ہو گئی تھی۔سوشل میڈیا پلیٹ فارم ایکس سروس کی مسلسل آنکھ مچولی کے باعث صارفین کو مشکلات کا سامنا کرنا پڑ رہا ہے۔ویب سائٹس کی بندش کو مانیٹر کرنے والی سائٹ ڈاون ڈیٹیکٹر کے مطابق ابتدا پاکستان میں 17 فروری کی شب 9 بجے سے ایکس کی سروس ڈاون ہونے کی شکایات موصول ہونا شروع ہوئی تھیں۔تاہم پاکستان ٹیلی کمیونیکیشن اتھارٹی (پی ٹی اے) ایکس کی بندش پر موقف دینے سے گریزاں ہے۔دوسری جانب انسانی حقوق کمیشن پاکستان نے انٹرنیٹ یا کسی بھی سوشل میڈیا پلیٹ فارم کو بند کرنے کے عمل کو فوری ختم کرنے کا مطالبہ کر دیا۔خیال رہے کہ ملک میں حالیہ وقت کے دوران کئی بار انٹرنیٹ اور سوشل میڈیا سروسز کی بندش سامنے آئیں جب کہ عام انتخابات کے روز سیکیورٹی خدشات کے پیش نظر انٹرنیٹ اور موبائل فون سروس معطل کی گئی تھی۔
