منی بجٹ کے خدشات منڈلانے لگے ، نئے ٹیکس لگانے کاخدشہ
شیئر کریں
حکومت نے آئی ایم ایف سے نیا ٹیکس لگانے کی اجازت مانگ لی، اسلام آباد میں میونسپل ٹیکس کی تیاریاں شروع کردی گئیں، این 25 شاہراہ کے بعد ایک اور منصوبے کیلئے نیا ٹیکس لگانے کی تجویز
نیا ٹیکس جناح میڈیکل کمپلیکس کی تعمیر کیلئے لگ سکتا ہے ، حکومت کو 3سالوں میں منصوبہ مکمل کرنے میں مالی وسائل میں مشکلات کا سامنا،آئی ایم ایف نے درخواست پر مزید تفصیلات طلب کر لیں،ذرائع
حکومت پاکستان نے آئی ایم ایف سے نیا ٹیکس لگانے کی اجازت مانگ لی، منی بل کے ذریعے نیا ٹیکس لگانے کا امکان ہے۔تفصیلات کے مطابق منی بجٹ کے خدشات منڈلانے لگے ، اسلام آباد میں میونسپل ٹیکس کی تیاریاں شروع کردی گئیں۔ذرائع نے بتایا کہ ممکنہ منی بجٹ میں منی بل کے ذریعے نیا ٹیکس لگانے کا امکان ہے ، نیا ٹیکس اسلام آباد میں جناح میڈیکل کمپلیکس کی تعمیر کے لیے لگ سکتا ہے۔وفاقی حکومت نے این 25 شاہراہ کے بعد ایک اور منصوبے کیلئے نیا ٹیکس لگانے کی تجویز دی اور آئی ایم ایف سے اسلام آباد میں نیا ٹیکس لگانے کی اجازت مانگ لی، میونسپل ٹیکس لگا کر اسلام آباد میں میڈیکل کمپلیکس کی تعمیر مکمل کی جائے گی۔ذرائع کا کہنا ہے کہ آئی ایم ایف نے پاکستان کی نئے ٹیکس کی درخواست پر مزید تفصیلات طلب کر لیں۔ذرائع نے کہا ہے کہ اسلام آباد میں تعمیر میڈیکل کمپلیکس کی لاگت 213ارب روپے آئے گی، حکومت کو 3سالوں میں منصوبہ مکمل کرنے میں مالی وسائل میں مشکلات ہیں۔ذرائع کا مزید کہنا تھا کہ حکومت منصوبے کیلئے ہنگامی فنڈ سے 30 ارب روپے فوری جاری کرنے پر غور کر رہی ہے ، ،وفاقی وزیراحسن اقبال نے بتایا کہ منصوبے کی پی ایس ڈی پی سے باہرسے فنڈنگ کی تجویز دیں گے۔ذرائع کے مطابق متبادل ذرائع میں ضمنی گرانٹس یا دوسرے منصوبوں کے فنڈز منتقل کرنا شامل ہے، وزارت خزانہ میڈیکل کمپلیکس منصوبے کو پی ایس ڈی پی کا حصہ بنانا چاہتی ہے، ذرائع حکومت 76 ملین ڈالر کے پانڈا بانڈز کے ممکنہ منافع کو بھی منصوبے پر لگانے پر غور کررہی ہے ، حکومت نے ابتدائی طور پر منصوبے کیلئے 3۔5 ارب روپے فراہم کر رکھے ہیں، رقم جناح میڈیکل کمپلیکس کمپنی کے قیام اور عملے کی بھرتی پر خرچ ہوگی۔
