شعبہ انجینئرنگ کی غفلت، پی آئی اے کے 34میں سے 17طیارے گراؤنڈ

ویب ڈیسک

جمعه, ۱۳ دسمبر ۲۰۲۴

شیئر کریں

قومی ایئر لائن کے شعبہ انجینئرنگ انتظامیہ کی مبینہ غفلت اور ناقص کارکردگی کے سبب پی آئی اے کے 34 کے فلیٹ میں 17طیارے گراؤنڈ ہوگئے ہیں ذرائع کے مطابق بوئنگ 777 کے بارہ طیاروں میں سے 7 گراؤنڈ ہیں، ایئر بس تھری ٹوئنٹی ساختہ 17طیاروں میں سے 7 گراؤنڈ ہیں، جب کہ 5 اے ٹی آر طیاروں میں سے صرف 2 طیارے فلائٹ آپریشنز میں حصہ لے رہے ہیں۔گراؤنڈ ہونے والے طیاروں میں زیادہ تر انجن، لینڈنگ گیئر سمیت دیگر پرزہ جات نہ ہونے کی وجہ سے گراؤنڈ ہیں جس سے قومی ایئر لائن کو کروڑوں ڈالر کے نقصان کا سامنا ہے ۔ ذرائع کا کہنا ہے کہ پی آئی اے کے زیادہ تر طیارے کئی سال سے گراؤنڈ ہیں اور گراؤنڈ ہونے والے طیاروں کے زیادہ تر پرزہ جات دوسرے طیاروں میں استعمال کیے جا چکے ہیں۔ادھر پی آئی اے کے ترجمان نے ایک بیان میں کہا ہے کہ پیرس کے لیے آپریٹ ہونے والا جہاز تیار ہو گیا ہے ۔