پی ٹی آئی کی ملک گیراحتجاجی تحریک شروع،عمران خان کو جیل میں خطرہ ہے،شاندانہ گلزار
شیئر کریں
سابق وزیراعظم نے پہلے ہی کہہ دیا تھا میرے خلاف سازش کی جا رہی ہے جس سے پاکستان کو نقصان ہوگا، عدالت میں پٹیشن دائر کی جا رہی ہے، بانی کو سائفر کیس میں بیرونی سازش کا نشانہ بنایا گیا
ہمارا ون پوائنٹ ایجنڈا عمران خان کی رہائی ،موجودہ حکمرانوں نے ملک کو مہنگائی، بدامنی،بے یقینی کی طرف دھکیل دیا ، خواتین اور بچے ڈرون حملوں کا نشانہ بن رہے ہیں،پریس کانفرنس سے خطاب
پی ٹی آئی رہنماء شاندار گلزار نے کہا ہے کہ تحریک تحفظ آئین پاکستان کے تحت پاکستان تحریک انصاف نے ملک بھر میں باقاعدہ احتجاجی تحریک کا آغاز کر دیا ہے، جس کا بنیادی مقصد عمران خان کی رہائی اور خیبرپختونخوا خصوصا قبائلی علاقوں میں امن کا قیام ہے۔پشاور پریس کلب میں پریس کانفرنس سے خطاب کرتے ہوئے شاندانہ گلزار نے کہا کہ آج ملک بھر کی طرح پشاور میں بھی احتجاج کیا جائے گا اور ہمارا ون پوائنٹ ایجنڈا عمران خان کی رہائی ہے۔انہوں نے الزام عائد کیا کہ قبائلی اضلاع میں ڈرون حملوں اور بم دھماکوں کے ذریعے بے گناہ شہریوں کو نشانہ بنایا جا رہا ہے۔انہوں نے کہا کہ سابق وزیراعظم عمران خان کو سائفر کیس میں بیرونی سازش کا نشانہ بنایا گیا اور موجودہ حکمرانوں نے ملک کو مہنگائی، بدامنی اور بے یقینی کی طرف دھکیل دیا ہے۔ ان کا کہنا تھا کہ خیبرپختونخوا کو اس کے وسائل، گیس اور بجلی سے محروم رکھا جا رہا ہے جبکہ عوام شدید معاشی مشکلات کا شکار ہیں۔شاندانہ گلزار نے وفاقی حکومت پر تنقید کرتے ہوئے کہا کہ صوبے میں دہشتگردی اور بدامنی میں اضافہ ہو چکا ہے جبکہ عمران خان کے دور حکومت میں صورتحال نسبتا بہتر تھی۔انہوں نے الزام لگایا کہ خواتین اور بچے بھی ڈرون حملوں کا نشانہ بن رہے ہیں۔پریس کانفرنس میں سینئر قانون دان معظم بٹ نے کہا کہ انہیں خدشہ ہے کہ عمران خان کی جان کو خطرہ لاحق ہو سکتا ہے، جس کے خلاف وہ پشاور ہائیکورٹ میں درخواست دائر کریں گے۔انہوں نے کہا کہ وفاقی حکومت، چیف الیکشن کمشنر اور تعلیمی اداروں کی آؤٹ سورسنگ کے خلاف بھی عدالت سے رجوع کیا جائے گا۔معظم بٹ کا کہنا تھا کہ احتجاج سیاسی جماعتوں کا آئینی حق ہے اور عدالت کو عمران خان کی سیکیورٹی یقینی بنانے کے لیے کردار ادا کرنا چاہیے۔
