گلگت بلتستان میں انتخابات مکمل،تحریک انصاف کی برتری کا دعویٰ،نون لیگ اور پیپلزپارٹی کے ایک دوسرے پر الزامات
شیئر کریں
تحریک انصاف اس وقت 70 فیصد حلقوں پر لیڈ کررہی ہے،8 فروری کا ری پلے شروع ہو چکا، آخری محاذ بھی عمران خان کے نام ہوگا، گلگت بلتستان الیکشن پر شفیع جان کا دعویٰ
غیر حتمی و غیر سرکاری نتائج آنے کا سلسلہ جاری، پی پی 3، آزاد امیدوار ایک نشست پر کامیاب ،نون لیگ ،اسلامی تحریک پاکستان ، استحکام پاکستان پارٹی کے امیدوار کامیاب
گلگت بلتستان کے انتخابات میں تحریک انصاف نے واضح برتری کا دعویٰ کیا ہے۔جبکہ جی بی انتخابات میں پیپلزپارٹی اور نون لیگ نے ایک دوسرے پر الزامات بھی لگائے۔ اطلاعات کے مطابق تحریک انصاف کے رہنماؤں نے جی بی کی تمام ۳۴ میں سے ۲۱ نشستوں پر فیصلہ کن لیڈ کا اعلان کرتے ہوئے بظاہرجشن کی تیاری شروع کر دی تھی۔جبکہ دوسری طرف سرکاری طور پر کسی واضح اعلان کے نہ ہونے اور نتائج میںقدرے تاخیر سے مبصرین نے یہ اندازے لگانے شروع کر دیے کہ انتخابی نتاج تحریک انصاف کے دعوے کے برعکس ہو سکتے ہیں۔ واضح رہے کہ تحریک انصاف فروری 2024 کے عام انتخابات کی طرح گلگت بلتستان میں بھی پارٹی شناخت اور ایک نشان سے محروم ہے۔ دوسری طرف رات گئے آنے والے نتائج قدرے مختلف طرح سے ظاہر ہو رہے ہیں۔ خیبرپختونخواہ کے وزیر اطلاعات شفیع جان نے دعویٰ کیا ہے کہ گلگت بلتستان اسمبلی کے انتخابات کے ابتدائی رجحانات میں پاکستان تحریک انصاف اس وقت خطے کے 70 فیصد حلقوں پر واضح برتری حاصل کیے ہوئے ہے، خطے میں 8 فروری کا ری پلے دوبارہ شروع ہو چکا ہے جہاں عوام نے بلے کے حمایت یافتہ امیدواروں کو بھرپور ووٹ دیٔے۔شفیع جان نے اپنے پیغام میں دعویٰ کیا کہ پاکستان تحریک انصاف کے حمایت یافتہ آزاد امیدواروں کو 24 میں سے بیشتر حلقوں پر واضح سبقت حاصل ہے، موجودہ وفاقی حکمران جماعت مسلم لیگ ن اور ان کے اتحادیوں کو عوام نے بری طرح مسترد کر دیا ہے اور ان کے تمام امیدوار انتخابی دوڑ میں آخری نمبروں پر موجود ہیں۔جبکہ دوسری جانب گلگت بلتستان اسمبلی کے عام انتخابات کے لیے ووٹوں کی گنتی کے بعد پہلے تین حلقوں کے مکمل غیر حتمی اور غیر سرکاری نتائج سامنے آ گئے۔ اطلاعات کے مطابق گلگت بلتستان قانون ساز اسمبلی کے انتخابات کے غیر حتمی و غیر سرکاری نتائج آنے کا سلسلہ جاری ہے، اب تک موصول ہونے والے نتائج میں پاکستان پیپلز پارٹی نے ابتدائی طور پر دو حلقوں میں کامیابی حاصل کی ہے، جبکہ ایک حلقے سے آزاد امیدوار بھاری اکثریت سے کامیاب قرار پائے۔بتایا گیا ہے کہ حلقہ جی بی اے 4 نگر کے تمام 53 پولنگ اسٹیشنز کا غیر حتمی اور غیر سرکاری نتیجہ مکمل طور پر سامنے آ چکا ہے، جہاں پاکستان پیپلز پارٹی کے محمد علی اختر مجموعی طور پر 7 ہزار 670 ووٹ حاصل کر کے پہلے نمبر پر رہے اور کامیاب قرار پائے، اسلامی تحریک پاکستان کے امیدوار محمد ایوب وزیری دوسرے نمبر پر رہے، جنہوں نے 6 ہزار 566 ووٹ حاصل کیے۔معلوم ہوا ہے کہ حلقہ جی بی اے 7 اسکردو کے تمام 31 پولنگ اسٹیشنز کے غیر حتمی اور غیر سرکاری نتائج بھی مکمل ہو چکے ہیں، یہاں پاکستان پیپلز پارٹی کے سید توقیر مہدی نے 4 ہزار 500 ووٹ لے کر میدان مار لیا، دوسرے نمبر پر استحکام پاکستان پارٹی کے امیدوار راجا جلال حسین خان رہے، جو 4 ہزار 56 ووٹ حاصل کر سکے جب کہ حلقہ جی بی اے 24 گھانچے 3 کے تمام 46 پولنگ اسٹیشنز کا غیر حتمی اور غیر سرکاری نتیجہ بھی مکمل موصول ہو گیا۔بتایا جارہا ہے کہ حلقہ جی بی اے 24 گھانچے 3 سے آزاد امیدوار اسد شفیق نے شاندار کارکردگی کا مظاہرہ کرتے ہوئے 8 ہزار 92 ووٹ حاصل کیے اور کامیابی اپنے نام کی، یہاں دوسرے نمبر پر پاکستان پیپلز پارٹی کے امیدوار محمد اسماعیل رہے، جنہوں نے 5 ہزار 72 ووٹ حاصل کیے، جبکہ دیگر 21 حلقوں میں ووٹوں کی گنتی اور نتائج کی تیاری کا عمل ریٹرننگ افسران کے دفاتر میں مروجہ قوانین کے مطابق جاری ہے۔
