عمران خان، پرویز الہٰی ملاقات ، اسمبلیوں کی تحلیل پر مشاورت
شیئر کریں
وزیراعلیٰ پنجاب چودھری پرویز الہٰی، سابق وفاقی وزیر مونس الہٰی اور ایم این اے حسین الہٰی نے زمان پارک میں پاکستان تحریک انصاف کے چیئرمین عمران خان سے ملاقات کی ملاقات میں اسمبلی کی تحلیل کے حوالے سے مشاورت کی گئی۔ عمران خان پنجاب اور خیبرپختونخوا کے وزرائے اعلیٰ کو ساتھ بٹھا کر فیصلے کا اعلان کریں گےـ وزیر اعلیٰ چودھری پرویز الہٰی، سابق وفاقی وزیر مونس الہٰی اور ایم این اے حسین الہٰی نے اس موقع پر کہا کہ عمران خان کے ہر فیصلے کا ساتھ دیں گے۔ وزیر اعلی پرویز الہٰی نے واضح کیا کہ پنجاب اسمبلی عمران خان کی امانت ہے اور یہ امانت انہیں واپس کر دی ہے۔ انہوں نے کہا کہ عمران خان نے مخالفین کی سیاست کو زیرو کر دیا ہے۔ افواہیں پھیلانے والے پہلے کی طرح اب بھی ناکام رہیں گے۔ مونس الہٰی نے کہا کہ ہمارا اتحاد پہلے سے زیادہ مضبوط ہے اور عمران خان کی آواز پر لبیک کہیں گے۔ وزیر اعلی خیبر پختونخوا محمود خان، شاہ محمود قریشی، اسد عمر، فواد چودھری، پرویز خٹک، شبلی فراز، علی امین گنڈاپور اور دیگر رہنما بھی اس موقع پر موجود تھے۔
