اسرائیلی فوج کی غزہ شہر پر مکمل قبضے کی تیاری
شیئر کریں
اسرائیلی بمباری میں مزید 50فلسطینی شہید، بھوک سے مرنیوالوں کی تعداد 317تک پہنچ گئی
زیتون اور شجاعیہ کے علاقوں میں اسرائیلی زمینی آپریشن کے دوران میں 1500سے زائد گھر تباہ
اسرائیلی فوج نے غزہ شہر کے مشرقی اور جنوبی حصوں میں شدید بمباری کی جس کے نتیجے میں 50فلسطینی شہید ہو گئے ، جن میں عورتیں اور بچے بھی شامل ہیں۔غرب میڈیاکے مطابق اسرائیلی فوج غزہ شہر پر مکمل قبضے کی تیاری کر رہی ہے ، جبکہ اقوام متحدہ اور دیگر عالمی اداروں نے اس کارروائی پر سخت تشویش ظاہر کی ہے ۔ اقوام متحدہ کے سیکریٹری جنرل انتونیو گوتریس نے کہا کہ غزہ میں فوجی کارروائی تباہ کن ثابت ہو گی اور لاکھوں شہری مزید بے گھر ہونے پر مجبور ہوں گے ۔غزہ کی سول ڈیفنس ایجنسی کے مطابق زیتون اور شجاعیہ کے علاقوں میں اسرائیلی زمینی آپریشن کے دوران 1500سے زائد گھر تباہ کر دیے گئے ہیں۔ شہریوں نے بتایاکہ وہ اپنے گھروں سے نکل کر ساحل کی طرف پناہ لینے پر مجبور ہیں۔غزہ کی وزارت صحت نے تصدیق کی ہے کہ غذائی قلت کے باعث مزید 4افراد شہید ہو گئے ہیں، جن میں 2بچے بھی شامل ہیں۔ اس طرح بھوک سے جاں بحق ہونے والوں کی تعداد 317تک پہنچ گئی ہے ۔ مجموعی طور پر اب تک غزہ میں 62ہزار 900سے زائد فلسطینی شہید ہو چکے ہیں جن میں اکثریت عورتوں اور بچوں کی ہے ۔
