پی ٹی آئی کا حکومت کے خلاف مہم چلانے کا اعلان
شیئر کریں
اڈیالہ جیل سے کال آتے ہی پورے ملک میں احتجاج ہوگا، پرامن رہیں گے
فارم 47کی حکومت کے تمام اعدادوشمار جھوٹے ہیں،عالیہ حمزہ کی پریس کانفرنس
تحریک انصاف پنجاب کی چیف آرگنائزر عالیہ حمزہ نے کہا ہے کہ حکومت کی کارکردگی کو عوام کے سامنے بے نقاب کرنے کیلئے بھرپور مہم چلائی جائے گی ،جیسے ہی اڈیالہ جیل سے کال آئے گی پورے ملک میں احتجاج ہوگا،8 فروری کو خاموش اور پرامن انقلاب آیا ہم اب بھی پرامن رہیں گے ۔پریس کلب میں پارٹی رہنمائوں کے ہمراہ پریس کانفرنس کرتے ہوئے عالیہ حمزہ نے کہا کہ فارم 47 کی حکومت کے تمام اعدادوشمار جھوٹے ہیں،ہم نے اپنے دور میں ایکسپورٹ کو بڑھایا،ہمارے دور میں تمام اشاریے مضبوط تھے ،ہم نے کورونا کے دور میں بھی نوکریاں دیں ،اب ایک کروڑ 80 لاکھ لوگ بیروزگار ہیں،جن کو یہ مافیا کہتے ہیں وہ ملکی معیشت کا بڑا حصہ ہیں، ہم نے کامیاب نوجوان پروگرام، صحت کارڈ، لنگر خانے جیسے منصوبے دئیے ،ہم نے ہر شہری کو 10 لاکھ کی صحت کی سہولت فراہم کی۔ انہوں نے کہا کہ حکومت نے فری لانسرز پر 18فیصد ٹیکس لگادیا ہے ،نوجوان ٹیکس کیسے ادا کرے گا،بجٹ میں سارا بوجھ تنخواہ دار طبقے پر ڈالا گیا اور اشرافیہ کو چھوڑ دیا گیا ہے ،حکومت عوام کو11کروڑ روپے فی گھنٹے کے حساب سے پڑرہی ہے اور یہ کر بھی کچھ نہیں رہے ،وزیرخزانہ قبول کر رہے ہیں کہ ہر چیز قرض لے کر کی جارہی ہے ،قرض لے کر ججز، اسپیکر اور پارلیمنٹ کی تنخواہیں بڑھائی جارہی ہیں۔انہوںنے کہا کہ ورلڈ بینک کی رپورٹ کے مطابق 44 فیصد لوگ خط غربت سے نیچے ہیں،حکومت کے تمام اعدادوشمار جھوٹ ہیں ،بجلی کا استعمال کم ہوگیا تو انڈسڑی کیسے ترقی کرے گی،چور حکومت ہیرا پھیری سے باز نہیں آرہی،تین سہ ماہیوں میں گروتھ منفی تھی پھر اچانک مثبت کیسے ہوگئی؟ حکومت کے اپنے اخراجات میں دو گنا اضافی ہوگیا ہے ،کوئی ایک ایسا بل نہیں لایا گیا جس سے عام آدمی کو فائدہ ہوا ہو۔سب سے بڑا حملہ کسان اور عام عوام پر کیا گیا ہے ۔ انہوں نے کہا کہ پاکستان تحریک انصاف حکومت کی ناقص کارکردگی پر بھرپور عوامی مہم چلائے گی،گلی گلی جاکر مہم چلائیں گے اس کے لئے بے شک مقدمے ہو ںیا جیلوں میں ڈالا جائے ،آج بھی جبر کے تمام ہتھکنڈوں کے باوجود پی ٹی آئی ملک کی سب سے بڑی اپوزیشن جماعت ہے ،بانی چیئرمین کے ساتھ جیل میں جوسلوک ہورہا ہے وہ بنیادی انسانی حقوق کے خلاف ہے ۔ عالیہ حمزہ نے کہا کہ کونسی پارٹی ہے جس کو اپنی ایک سماعت لگوانے کے لئے پورے پنجاب سے جاکر عدالت کے باہر احتجاج کرنا پڑا ہو؟ جب ہم احتجاج کرتے ہیں تو پھر فتنہ اور فساد کہا جاتا ہے ،ہمارے احتجاج پر لائٹ بند کرکے گولیاں چلائیں گئیں،جیسے ہی اڈیالہ جیل سے کال آئے گی پورے ملک میں احتجاج ہوگا۔
