شمالی غزہ ،القسام کے حملے میں 20اسرائیلی فوجی ہلاک ، متعددزخمی
شیئر کریں
شمالی غزہ میں القسام کے حملے میں 20اسرائیلی فوجی ہلاک اور متعددزخمی ہوگئے ۔غیرملکی خبررساں ادارے کے مطابق اسلامی تحریک مزاحمت حماس کے عسکری ونگ القسام بریگیڈز نے اعلان کیا کہ اس نے بیت لاہیہ میں قابض اسرائیلی فوج پر گھات لگا کر حملہ کیا ہے جس کے بعد قابض فوج اور مجاہدین کے درمیان گھمسان کی لڑائی شروع ہوگئی۔بریگیڈز نے ایک بیان میں کہا کہ ان کے مجاہدین نے وسطی بیت لاہیا میں طیبہ مسجد کے قریب ایک مکان میں 10فوجیوں پر مشتمل اسرائیلی فوج کیساتھ مشین گنوں اور دستی بموں سے حملہ کیا جس کے نتیجے میں وہ ہلاک اور زخمی ہوگئے ۔القسام نے بتایا کہ 10فوجیوں پر مشتمل ایک اور اسرائیلی فورس کو غزہ شہر کے شمال مغرب میں التوام کے علاقے میں اینٹی پرسنل شیل سے نشانہ بنایا گیا جس سے اس کے ارکان ہلاک اور زخمی ہو گئے ۔بریگیڈز نے یہ بھی اعلان کیا کہ انہوں نے اسی سڑک پر ایک اسرائیلی مرکاوا ٹینک کو اینٹی ٹینک میزائل الیاسین 105 سے نشانہ بنایا۔ بیت لاہیہ کا علاقہ مزاحمت کاروں اور قابض فوج کے درمیان شدید جھڑپوں کا مرکز بنا ہوا ہے ۔بیت لاہیہ کا حملہ غزہ کی پٹی کے شمال اور جنوب میں گذشتہ چند دنوں میں القسام کی جانب سے کی جانے والی متعدد کارروائیوں کے بعد ہوا ہے جس کے نتیجے میں اسرائیلی فوجی ہلاک اور زخمی ہوئے ہیں۔القسام نے اعلان کیاکہ اس نے القدس بریگیڈز کے ساتھ مل کر وسطی غزہ کی پٹی میں نیٹزاریم محور میں قابض اسرائیلی فوج کے ایک کمانڈ اینڈ کنٹرول سائٹ کو بھاری صلاحیت کے مارٹر گولوں سے نشانہ بنایا۔
