اسلام آباد میں فوج طلب، موقع پر گولی مارنے کا حکم
شیئر کریں
پاکستان تحریک انصاف کے احتجاج کے دوران حالات سے نمٹنے کیلئے اسلام آباد میں فوج طلب کرلی گئی ہے ، وزارت داخلہ نے نوٹیفکیشن جا ری کردیا۔ذرائع کے مطابق آرٹیکل 245 کے تحت پاک فوج کو بھی بلا لیا گیا ہے اور واضح کیا گیا ہے کہ قانون توڑنے والوں سے آہنی ہاتھوں سے نمٹا جائے گا۔نوٹیفکیشن کے مطابق آرمی کو کسی بھی علاقے میں امن امان کی صورتحال برقرار رکھنے کیلئے کرفیو لگانے کے اختیارات بھی تفویض کیے گئے ہیں۔ذرائع کے مطابق سکیورٹی اداروں کو موقع پر گولی مارنے کے واضح احکامات دیئے گئے ہیں۔خیال رہے کہ اسلام آباد میں پی ٹی آئی کے احتجاجی مظاہرے کے دوران سری نگر ہائی وے پر رینجرز اہلکاروں پر گاڑی چڑھنے کا افسوس ناک واقعہ پیش آیا۔ جس سے 4 رینجرز اہلکار شہید جبکہ 5رینجرز اور 2پولیس کے جوان بھی شدید زخمی ہو گئے ۔سکیورٹی ذرائع کے مطابق قانون نافذ کرنے والے اداروں پر حملوں میں اب تک رینجرز کے 4جوان شہید اور پولیس کے 2جوان شہید ہو چکے ہیں جبکہ اب تک 100 سے زائد پولیس اہلکار زخمی ہو چکے ہیں جن میں متعدد شدید زخمی ہیں۔
