بنگلہ دیش : عام انتخابات میں شیخ حسینہ واجد پانچویں بار کامیاب
شیئر کریں
گزشتہ روز ہونے والے عام انتخابات میں بنگلہ دیش کی وزیر اعظم شیخ حسینہ واجد نے پانچویں بار کامیابی حاصل کرلی۔میڈیا رپورٹس کے مطابق بنگلہ دیش کے الیکشن کمیشن کے ترجمان کا حوالہ دیتے ہوئے بتایا گیا ہے کہ شیخ حسینہ واجد کی حکمران جماعت عوامی لیگ نے انتخابات میں کامیابی حاصل کرلی ہے۔اتوار کو ہونے والے انتخابات کے نتائج کے مطابق حسینہ واجد کی جماعت عوامی لیگ اور اْن کی اتحادی جماعتوں نے 300 پارلیمانی نشستوں میں سے کم از کم 223 نشستیں جیت لی ہیں، ان نتائج کے بعد اب حسینہ واجد مزید پانچ سال تک اقتدار میں رہیں گی۔رپورٹ کے مطابق بنگلہ دیش میں گزشتہ روز ہونے والے عام انتخابات میں وٹنگ کا تناسب گزشتہ عام انتخابات کے مقابلے میں50 فیصد کم رہا، 2018ء میں ووٹنگ کا تناسب 80 فیصد تھا اور موجودہ انتخابات میں صرف 40 فیصد رہا۔ رپورٹ کے مطابق ملک کی سب سے بڑی اپوزیشن جماعت بنگلہ دیش نیشنلسٹ پارٹی نے عام انتخابات کے بائیکاٹ کرتے ہوئے عوام سے اپیل کی تھی کہ وہ بھی انتخابی عمل کا بائیکاٹ کریں جس کی وجہ سے عام انتخابات میں ووٹرز ٹرن آؤٹ کم رہا۔رپورٹ میں بتایا گیا ہے کہ بنگلہ دیش میں ووٹرز کی بڑی تعداد نے اپوزیشن کی بائیکاٹ مہم کا ساتھ دیا اور اس مہم نے انتخابات سے قبل حکومت کی طرف سے کیے گئے بڑے کریک ڈائون کی طرف توجہ مبذول کروائی۔
