فوج شہریوں کے حقوق تحفظ کیلئے پرعزم ،فیلڈ مارشل
شیئر کریں
بین المذاہب ہم آہنگی اور اتحاد پاکستان کی اصل طاقت ہے، اقلیتوں کے حقوق کا تحفظ پاکستان کے نظریے کی بنیاد ہے،کرسمس تقریب سے خطاب، مسیحی برادری کے رہنماؤں کا اظہار تشکر
چیف آف ڈیفنس فورسز کی کرائسٹ چرچ میں کرسمس کی تقریبات میں شرکت، مسیحی برادری کو کرسمس کی دلی مبارکباد، امن، ہم آہنگی اور خوشحالی کیلئے نیک تمناؤں کا اظہار کیا،آئی ایس پی آر
فیلڈ مارشل سید عاصم منیر کا کہنا ہے کہ پاک فوج تمام شہریوں کے وقار، سلامتی اور مساوی حقوق کے تحفظ کیلئے پرعزم ہے۔ مسلح افواج کے شعبہ تعلقات عامہ ( آئی ایس پی آر ) کے مطابق فیلڈ مارشل سید عاصم منیر نے راولپنڈی کے کرائسٹ چرچ میں کرسمس کی تقریبات میں شرکت کی، اس خوشی کے موقع کو یادگار بنانے میں آرمی چیف مسیحی برادری کے ساتھ شامل ہوئے۔معلوم ہوا ہے کہ فئلڈ مارشل نے کرسمس کی مبارکباد اور کمیونٹی کے لیے امن، ہم آہنگی اور خوشحالی کے لیے نیک خواہشات کا اظہار کیا جب کہ مسیحی برادری کے رہنماؤں نے فیلڈ مارشل کے دورہ پاکستان پر اظہار تشکر کرتے ہوئے وطن کے تحفظ، شمولیت، مذہبی ہم آہنگی اور پاکستان میں قومی یکجہتی کے لیے پاکستان کی مسلح افواج کے کردار کو سراہا۔اس موقع پہر اپنے خطاب میں آرمی چیف نے کہا کہ اقلیتوں کے حقوق کا تحفظ پاکستان کے نظریے کی بنیاد ہے، پاکستانی مسیحیوں کی قومی ترقی اور دفاع میں خدمات قابلِ فخر ہیں، بین المذاہب ہم آہنگی اور اتحاد پاکستان کی اصل طاقت ہے،پاک فوج تمام شہریوں کے وقار، سلامتی اور مساوی حقوق کے تحفظ کے لیے پرعزم ہے۔بتایا گیا ہے کہ قائداعظم محمد علی جناح کو خراج تحسین پیش کرتے ہوئے فیلڈ مارشل نے مساوات، آزادی اور مذہبی رواداری کے بانی کے وژن کو اجاگر کیا، نظریہ پاکستان کے بنیادی ستون کے طور پر اقلیتوں کے حقوق کے تحفظ پر زور دیا، فیلڈ مارشل نے قومی ترقی اور سلامتی کے لیے پاکستانی مسیحیوں کی لازوال خدمات پر روشنی ڈالی، جس میں پاکستان کی مسلح افواج میں نسل در نسل ان کی قابل فخر اور ممتاز خدمات بھی شامل ہیں۔فوج کے ترجمان ادارے نے بتایا کہ چیف آف ڈیفنس فورسز نے پاکستان کے آئین میں درج تمام شہریوں کے وقار، سلامتی اور مساوی حقوق کو برقرار رکھنے کے لیے پاکستان کی مسلح افواج کے عزم کا اعادہ کیا، انہوں نے بین المذاہب ہم آہنگی، باہمی احترام اور اتحاد کی اہمیت پر زور دیتے ہوئے کہا کہ پاکستان کی طاقت اس کے تنوع، مساوی مواقع اور مذہب، نسل، ذات پات اور نسل سے بالاتر مشترکہ آئینی اقدار میں مضمر ہے۔
