عمران خان کے آصف زرداری پرالزامات بے ہودہ اورلغوہیں'سعیدغنی
شیئر کریں
وزیر محنت و افرادی قوت سندھ سعید غنی نے کہا ہے کہ عمران خان قوم کو گمراہ کرنے اور اپنی آئین شکنی پر پردہ ڈالنے کے لئے سب پر بے بنیاد الزامات لگا رہا ہے۔ عمران خان اس ملک کی معیشت کے راستے میں بارود بچھا کر گیا ہے۔ فواد چوہدری کی آصف علی زرداری کے ارکان کو 40 کروڑ دینے کی باتیں اس بات کو عیاں کرتی ہیں کہ پی ٹی آئی کے بہت سے ارکان پرویز الہی کو ووٹ نہیں دینا چاہتے۔فواد چوہدری نے جو باتیں اور الزامات لگائے ہیں وہ جھوٹ اور بیہودہ ہیں۔ بدھ کو فواد چوہدری کے بیان پر ردعمل دیتے ہوئے سعید غنی نے کہا کہ فواد چوہدری نے جو باتیں اور الزامات لگائے ہیں وہ جھوٹ اور بیہودہ ہیں۔ فواد چوہدری کی آصف علی زرداری کے ارکان کو 40 کروڑ دینے کی باتیں اس بات کو عیاں کرتی ہیں کہ پی ٹی آئی کے بہت سے ارکان پرویز الہی کو ووٹ نہیں دینا چاہتے۔ انہوں نے کہا کہ عمران خان کی جانب سے بھی اس بات کا اعتراف ہے کہ پی ٹی آئی کے ممبران وزیر اعلٰی پنجاب کے انتخاب میں پرویز الٰہی کو ووٹ نہیں دینا چاہتے۔ سعید غنی نے کہا کہ یہ لوگ اپنی آپسی لڑائی اور ممبران کو نہ سنبھال سکنے کا الزام پیپلز پارٹی، آصف علی زرداری یا کسی اور شخص یا جماعت پر لگا کر اپنی جان چھڑانے کی کوشش کررہے ہیں۔ سعید غنی نے کہا کہ پوری قوم کے سامنے یہ بات عیاں ہوگئی ہے کہ اس ملک کی معیشت اور اس ملک میں سیاسی عدم استحکام کا اگر کوئی ذمہ دار ہے تو وہ صرف اور صرف عمران خان ہے۔ عمران خان اپنی ذات سے آگے کسی کو دیکھنا نہیں چاہتا۔ عمران نیازی نے اپنی ذاتی انا کی تسکین کے لئے پہلے اس ملک کی پارلیمنٹ کو تماشہ بنایا، آئین شکنی کی اور صدر پاکستان، اسپیکر و ڈپٹی اسپیکر قومی اسمبلی و اس وقت کے وزیر قانون فواد چودھری سے آئین شکنی کروائی۔ سعید غنی نے مزید کہا کہ سپریم کورٹ کے فیصلے نے یہ بات واضح کردی کہ یہ تمام افراد پاکستان کے آئین کو توڑنے کے مرتکب ہوئے ہیں اور انہیں سزا ملنی چاہیے۔ عمران نیازی آج اس الیکشن کمیشن پر الزامات لگا رہا ہے جو اس وقت اس ملک کی تاریخ کا غیر متنازعہ الیکشن کمیشن ہے جو اپنی ذمہ داریاں پوری کرنے کی کوشش کررہا ہے۔ الیکشن کمیشن عمران خان کی ایما پر نہیں چل رہا ہے اس لئے وہ اسے گالیاں دے رہا ہے۔ سعید غنی نے کہا کہ اگر آج ہماری فوج اور اسٹیبلشمنٹ نے اگر یہ فیصلہ کیا ہے کہ وہ اس ملک کی سیاست میں مداخلت نہیں کرے گی تو یہ آئین اور ان کے حلف کی پاسداری ہے۔ اگر عدلیہ آئین کے مطابق فیصلے کرے تو عمران خان ججوں پر دبائو ڈالنے کی کوشش کرتا ہے۔ سعید غنی نے کہا کہ عمران خان اس ملک کی معیشت کے راستے میں بارود بچھا کر گیا ہے۔ اس نے اس ملک کی معیشت کو تباہ و برباد کرنے کی کوشش کی ہے۔ آج اس ملک کی معیشت کو جتنا نقصان پہنچ رہا ہے اس کا ذمہ دار صرف اور صرف عمران خان ہے۔ عمران خان قوم کو گمراہ کرنے اور اپنی آئین شکنی پر پردہ ڈالنے کیلئے سب پر بے بنیاد الزامات لگا رہا ہے۔ سعید غنی نے کہا کہ عمران خان پاکستان کے آئین، اداروں کے فیصلوں اور اسٹیبلشمنٹ کے غیر سیاسی کردار کو تسلیم کرے۔ انشاء اللہ جب بھی عام انتخابات ہوئے پی ٹی آئی کو عبرتناک شکست ہوگی۔
