سندھ بلڈنگ ناجائز تعمیرات کی روک تھام میں مکمل ناکام
شیئر کریں
سندھ بلڈنگ کنٹرول اتھارٹی ناجائز تعمیرات کی روک تھام میں مکمل طور پر ناکام ہو چکا ہے ۔بدعنوان بلڈنگ انسپکٹر اورنگزیب کی غیر قانونی امور کی سرپرستی سے متعلق عوامی و سماجی شخصیات کی شکایات ردی کی ٹوکری کی نذرکی جانے لگی ہیں۔ صحافیوں کی نشاندہی کو بھی مکمل طور پر نظر انداز کیا جانے لگا ہے ۔تفصیلات کے مطابق غیر قانونی تعمیرات کی روک تھام اور بلڈنگ بائی لاز پر عملدرآمد یقینی بناکر صوبے کا تعمیراتی بنیادی ڈھانچہ تباہی سے بچانے کیلئے قائم کیا گیا۔ ادارہ سندھ بلڈنگ کنٹرول اتھارٹی مکمل طور پر ناکام دکھائی دیتا ہے ۔ یہی وجہ ہے کہ کراچی بھر میں تعمیراتی کاموں کے دوران بدعنوان افسران کی ملی بھگت سے بلڈنگ قوانین اور اعلیٰ عدلیہ کے احکامات ہوا میں اڑانے کا سلسلہ بلا خوف وخطر جاری ہے ۔ دوسری جانب بلڈنگ بائی لاز کے خلاف قرار دیکر نمائشی طور پر منہدم کی جانے والی عمارتوں کی ازسرنو تعمیرات کی روایت بھی برقرار ہے ۔علاقے میں پانی بجلی گیس سیوریج اور پارکنگ کے بنیادی مسائل میں دن بہ دن اضافہ ہو رہا ہے ۔ اس وقت بھی ناظم آباد نمبر 1بلاک Eکے پلاٹ نمبر 10/2اور 15/2پر بغیر نقشے اور منظوری کے تعمیرات جاری ہیں، جس پر ناظم آباد کے عوام کا مطالبہ ہے کہ وزیر بلدیات سندھ ڈائریکٹر جنرل سندھ بلڈنگ کنٹرول اتھارٹی غیر قانونی تعمیرات میں ملوث افسران و نام نہاد بیٹروں کے خلاف سندھ ہائیکورٹ اوراینٹی کرپشن اور دیگر اداروں سے تحقیقات کروائیں اور قومی خزانے کو نقصان پہنچانے والے اور ان کی سرپرستی کرنے والوں کے خلاف محکمہ جاتی کارروائی عمل میں لا کر ملوث افراد کو کیفرکردار تک پہنچایا جائے ۔
