آسٹریلیا ،شاپنگ سینٹر میں چاقو حملہ، 6افراد ہلاک، متعدد زخمی
شیئر کریں
آسٹریلیا کے شہر سڈنی کے شاپنگ سینٹر میں چاقو سے ہونے والے حملے میں 6افراد ہلاک اور متعدد زخمی ہو گئے، واقعہ کے بعد پولیس کی فائرنگ سے ملزم ہلاک ہوگیا۔ غیرملکی خبررساں ادارے کے مطابق نیو سائوتھ ویلز کے پولیس اسسٹنٹ کمشنر انتھونی کوک نے کہا کہ ملزم کو شاپنگ سینٹر میں جائے وقوع پر ایک خاتون پولیس افسر نے جوابی کارروائی کرتے ہوئے ہلاک کیا، ابھی تک ملزم کی شناخت نہیں ہوسکی۔انہوں نے کہا کہ واقعہ کی اطلاع مقامی وقت کے مطابق شام 4 بچے ملی، ابتدائی تحقیقات کے مطابق ملزم نے اکیلے ہی لوگوں پر چاقو سے حملہ کیا، جوابی کارروائی سے ملزم ہلاک ہوگیا، اب شاپنگ سینٹر میں کوئی خطرہ نہیں تاہم اب بھی صورتحال کا جائزہ لے رہے ہیں اور حملہ آور کے مقاصد کا تعین کررہے ہیں۔انہوں نے کہا کہ واقعہ میں 8 ماہ کے بچے اور اس کی ماں سمیت 8 افراد زخمی ہوئے جنہیں ہسپتال منتقل کردیا گیا ، کئی لوگوں کی حالت تشویش ناک ہے جبکہ 6افراد ہلاک ہوگئے ۔سوشل میڈیا پر مال کے اندر سے ریکارڈ ہونے والی ویڈیوز اور تصاویر سے معلوم ہوتا ہے کہ حملہ آور شارٹس اور سپورٹس جرسی پہنے ہوئے ہے اور اس کے ہاتھ میں چاقو ہے۔واقعہ کے وقت شاپنگ سینٹر میں خریداروں کا رش تھا، مقامی میڈیا نے بتایا کہ واقعہ کے بعد سینکڑوں لوگوں کو شاپنگ سینٹر سے نکال لیا گیا ، سوشل میڈیا ویڈیوز میں دیکھا گیا کہ واقعہ کے بعد شہریوں میں خوف و ہراس پھیل گیا۔
