سندھ بلڈنگ، ماڈل کالونی میں غیرقانونی تعمیرات سے بنیادی ڈھانچہ تباہ
شیئر کریں
ذوالفقار بلیدی کی ملی بھگت سے تعمیراتی دہشت،سیوریج تباہ، سڑکیں تالاب میں تبدیل
شیٹ نمبر 5پلاٹ 92پر دُکانیں اور غیر قانونی کمرشل پورشن کی تعمیرات تکمیل کے قریب
ضلع کورنگی کے رہائشی علاقے ماڈل کالونی میں سندھ بلڈنگ کنٹرول اتھارٹی کے اسسٹنٹ ڈائریکٹر ذوالفقار بلیدی کی مبینہ ملی بھگت سے ہونے والی غیرقانونی تعمیرات نے بنیادی ڈھانچے کو تباہ کر کے رکھ دیا ہے، جہاں سیوریج کا نظام مکمل طور پر درہم برہم ہوچکا ہے اور سڑکیں مسلسل کھڑے پانی سے تالاب کا منظر پیش کررہی ہیں، جبکہ شہریوں کی مشکلات میں انتہائی تشویشناک حد تک اضافہ ہوگیا ہے ۔جرأت سروے ٹیم سے بات کرتے ہوئے علاقہ مکینوں کا کہنا ہے کہ غیرقانونی تعمیرات کے باعث سیوریج لائنیں مسلسل پھٹنے اور بلاک ہونے کا شکار ہیں،جس سے گندے پانی کا عفونت زدہ طوفان سڑکوں اور گلیوں میں امڈ آیا ہے ۔ نتیجتاً، ہر طرف بدبو اور گندگی کا راج ہے جبکہ مچھر اور مکھیوں کی بھرمار نے علاقے میں صحت عامہ کے شدید خطرات پیدا کردیے ہیں۔سیوریج کے پھٹنے اور پانی کے مسلسل کھڑے رہنے کے باعث علاقے کی سڑکیں اب تالاب میں تبدیل ہوچکی ہیں،جس سے رہائشیوں کو روزمرہ کی آمدورفت میں شدید مشکلات کا سامنا ہے ۔ بچوں کے اسکول جانا مشکل ہوگیا ہے جبکہ گاڑیوں کے مسلسل پانی میں پھنسنے کے واقعات رونما ہورہے ہیں۔ذمہ دار حلقوں کا کہنا ہے کہ علاقے میں غیرقانونی تعمیرات کی روک تھام کے بجائے سندھ بلڈنگ کنٹرول اتھارٹی کے افسران بلڈنگ مافیا ملی بھگت سے غیر قانونی دھندوں کو جاری رکھے ہوئے ہیں۔اس کی واضح مثال شیٹ نمبر 5 کے پلاٹ نمبر 92 پر جاری غیرقانونی تعمیر ہے ، جہاں مقررہ نقشہ کے برعکس دکانیں اور کمرشل پورشن کی تعمیر تکمیل کے آخری مراحل میں داخل ہوچکی ہے ، جس سے علاقے میں بنیادی ڈھانچے پر مزید دباؤ بڑھنے کا خدشہ پیدا ہوگیا ہے ۔علاقے کے مکینوں نے سندھ بلڈنگ کنٹرول اتھارٹی کے ڈائریکٹر جنرل اور صوبائی وزیر برائے لوکل گورنمنٹ سے فوری اور سخت کارروائی کا مطالبہ کیا ہے ۔ان کا کہنا ہے کہ اگر فوری طور پر غیرقانونی تعمیرات کو گرانے اور سیوریج نظام کی بحالی کے لیے اقدامات نہ اٹھائے گئے تو صورتحال مزید سنگین ہوسکتی ہے ۔
