پاکستان ویمنز دوسرا ون ڈے بھی ہار گئیں، جنوبی افریقا کو سیریز میں فیصلہ کن برتری حاصل
شیئر کریں
جنوبی افریقا ویمنز کرکٹ ٹیم نے دوسرے ون ڈے میں پاکستان کو 6 وکٹوں سے جیت کر سیریز میں 0-2کی فیصلہ کن برتری حاصل کرلی، پاکستان ٹیم پہلے بیٹنگ کرتے ہوئے 168رنز بنا کر آؤٹ ہوگئی، جواب میں جنوبی افریقا کی ٹیم نے 34 اوورز میں 4 وکٹوں کے نقصان پر مطلوبہ اسکور پوراکیا۔ تفصیلات کے مطابق نیشنل بینک اسٹیڈیم کراچی میں کھیلے گئے دوسرے ون ڈے میں پاکستان ویمنز ٹیم نے ٹاس جیت کر پہلے بیٹنگ کی اور پوری ٹیم 44.2 اوورز میں 168 رنز بناکر آؤٹ ہوگئی۔ پاکستان ویمنز ٹیم کا آغاز خاصا مایوس کن رہا اور میزبان ٹیم 49 رنز پر6 وکٹیں گر جانے سے مشکلات میں پھنس گئی تاہم عالیہ ریاض اور فاطمہ ثنا نے 7 ویں وکٹ کی شراکت میں قیمتی 114 رنز کا اضافہ کیا جو ون ڈے انٹرنیشنل میں پاکستان ویمنز کی طرف سے ساتویں وکٹ کی ریکارڈ شراکت ہے۔ عالیہ ریاض نے تین چوکوں کی مدد سے 53 رنز اسکور کیے۔ فاطمہ ثناء نے 87 گیندوں پر 69 رنز کی اننگز کھیلی، پاکستان ٹیم 168 رنز بنا کر آؤٹ ہوگئی۔ جنوبی افریقی بولر نیدین ڈی کلرک نے 4 اور مازاباٹا کلاز نے 3 کھلاڑیوں کو آؤٹ کیا۔ جواب میں جنوبی افریقا کی خواتین ٹیم نے 34 اوورز میں 4 وکٹوں کے نقصان پر مطلوبہ اسکور پورا کر لیا۔ جنوبی افریقا ویمنز کی اننگز میں ٹیزمین برٹس چار چوکوں اور ایک چھکے کی مدد سے 45 رنز بنا کر ٹاپ اسکورر رہیں جبکہ لارا گوڈال نے 36 رنز بنائے۔ یوں جنوبی افریقا نے میچ 6 وکٹوں سے جیت کر سیریز میں 0-2 کی فیصلہ کن برتری حاصل کرلی۔ سیریز کا تیسرا اور آخری ون ڈے انٹرنیشنل میچ جمعرات کو کھیلا جائے گا۔
