شاہ نورانی حادثہ: جاں بحق افراد کی تعداد 18 ہو گئی
شیئر کریں
شاہ نورانی حادثے کا ایک زخمی ٹراما سینٹر کراچی میں دم توڑ گیا، جس کے بعد حادثے میں جاں بحق ہونے والے افراد کی تعداد 18 ہو گئی۔ حب میں واقع درگاہ شاہ نورانی کی جانب جانے والا ٹرک عیاں پیر کے قریب کھائی میں جا گرا تھا، جس کے نتیجے میں ٹرک پر سوار 17 افراد جاں بحق جبکہ 40 سے زائد زخمی ہو گئے تھے۔ جاں بحق افراد کی میتوں کو حب کے گورنمنٹ جام غلام قادر اسپتال منتقل کیا گیا جنہیں بعد میں ایدھی سینٹر سہراب گوٹھ کے سرد خانے منتقل کیا گیا جبکہ 20 سے زائد زخمیوں کو طبی امداد فراہم کر کے کراچی منتقل کیا گیا۔ پولیس کے مطابق ایمبولنسز کی تاخیر کی وجہ سے شدید زخمیوں کو پرائیویٹ گاڑیوں میں کراچی منتقل کرنا پڑا۔ حادثے کے زخمیوں کو ٹراما سینٹر کراچی میں طبی امداد دی جا رہی تھی کہ ایک زخمی دورانِ علاج زخموں کی تاب نہ لاتے ہوئے دم توڑ گیا۔ زخمیوں میں سے بیشتر افراد کی حالت تشویش ناک بتائی جاتی ہے، ٹرک میں 45 سے زائد افراد سوار تھے جن کا تعلق سندھ کے ضلع ٹھٹھہ سے بتایا جاتا ہے۔ ایس ایس پی حب منظور بلیدی کے مطابق زخمیوں کو حب کے جام غلام قادر اسپتال میں طبی امداد فراہم کرنے کے بعد کراچی منتقل کیا گیا جبکہ شدید تشویش ناک حالت میں مبتلا زخمیوں کو براہِ راست پرائیویٹ گاڑیوں میں کراچی لایا گیا۔
