سپریم کورٹ نے شیخ رشید کو طلب کر لیا، آڈٹ رپورٹ پر اظہار برہمی
شیئر کریں
سپریم کورٹ آف پاکستان نے ریلوے خسارہ کیس میں وزیر ریلوے شیخ رشید احمدسیکرٹری ریلوے اور سی او ریلوے کو (آج) منگل کو طلب کر تے ہوئے کہا ہے کہ ریلوے میں کوئی چیز درست نہیں چل رہی،چیف جسٹس گلزار احمدنے وزیر ریلوے کا نام لئے بغیر ریمارکس دئیے کہ ریلوے والا روز حکومت گراتا اور بناتاہے ، لیکن وزارت سنبھال نہیں پا رہے ، ریلوے کا پورا محکمہ سیاست میں پڑا ہوا ہے ۔پیر کو چیف جسٹس پاکستان گلزار احمد کی سربراہی میں سپریم کورٹ کے تین رکنی بینچ نے ریلوے خسارہ کیس کی سماعت کی۔ عدالت عظمی نے وزیر ریلوے شیخ رشید احمد ، سیکرٹری ریلوے اور سی او ریلوے کو (آج) منگل کو طلب کرلیا۔سپریم کورٹ نے ریلوے سے متعلق آڈٹ رپورٹ پر اظہار برہمی کرتے ہوئے کہا کہ ریلوے وزارت لینے والے کو پہلے خود ٹرین پر سفر کرنا چاہیے ، آپ کا ریکارڈ کمپیوٹرائزڈ ہونے کے بجائے مینول ہے ، ریلوے میں کوئی چیز درست انداز میں نہیں چل رہی ، اس سے زیادہ کرپٹ پاکستان میں کوئی ادارہ نہیں، اسٹیشن درست ہیں نہ ٹریک اور نہ ہی سگنل، ریل پر سفر کرنے والا ہر فرد خطرے میں سفر کر رہا ہے ، ٹرینوں میں نہ مسافر ہیں نہ مال گاڑیاں چل رہی ہیں۔جسٹس اعجاز الاحسن نے کہا کہ ریلوے کا نظام چل ہی نہیں رہا اور رپورٹ نے واضح کر دیا ہے کہ محکمے کو اربوں روپے کا خسارہ ہو رہا ہے ۔چیف جسٹس گلزار احمدنے وزیر ریلوے کا نام لئے بغیر ریمارکس دئیے کہ ریلوے والا روز حکومت گراتا اور بناتاہے ، لیکن وزارت سنبھال نہیں پا رہے ، ریلوے کا پورا محکمہ سیاست میں پڑا ہوا ہے ، آج بھی ہم پاکستان میں اٹھارھویں صدی کی ریل چلا رہے ہیں، جبکہ دنیا بلٹ ٹرین چلا کر مزید آگے جا رہی ہے ، ریلوے میں جو آگ لگی تھی اس معاملے کا کیا ہوا؟۔ریلوے کے وکیل نے بتایا کہ معاملے پر انکوائری ہوئی اور دو افراد کے خلاف کارروائی ہوئی ہے ۔ چیف جسٹس نے سخت برہمی کا اظہار کرتے ہوئے کہا کہ چولہے میں پھینکیں اپنی کارروائی، ریلوے کے سی او عدالت میں پیش کیوں نہیں ہوئے ۔وکیل ریلوے نے بتایا کہ نوٹس سابق سی او کو گیا تھا اور وہ اب موجود نہیں۔ عدالت نے سی او ریلوے سمیت دیگر حکام کو طلب کرتے ہوئے کیس کی سماعت کل تک ملتوی کردی۔
