سندھ بلڈنگ، وسطی میں غیر قانونی تعمیرات، بلند عمارتیں قانون سے بے نیاز!
شیئر کریں
ناظم آباد نمبر 3میں پلاٹ ایچ 6/26پر تیسری جبکہ ایف 19/2 پر چھٹی منزل کی تیاریاں
اسسٹنٹ ڈائریکٹر زبیر مرتضیٰ کی ملی بھگت ، مکینوں کا ڈی جی وسیم شمشاد سے تحقیقات کا مطالبہ
وسطی میں غیر قانونی تعمیرات کا راج برقرار ہے ۔ناظم آباد نمبر 3 میں مبینہ خلافِ ضابطہ تعمیرات کا سلسلہ جاری ہے ، جہاں پلاٹ نمبر ایچ 6/26 پر تیسری جبکہ پلاٹ نمبر ایف 19/2 پر چھٹی منزل کی تعمیر کی تیاریاں شروع ہونے پر علاقہ مکینوں نے تشویش کا اظہار کیا ہے۔
شہریوں کے مطابق رہائشی عمارتوں میں اضافی منزلوں کی تعمیر سے متعلق قواعد و ضوابط پر عمل درآمد یقینی بنانا متعلقہ اداروں کی ذمہ داری ہے ۔مکینوں نے الزام عائد کیا ہے کہ اسسٹنٹ ڈائریکٹر زبیر مرتضیٰ کی مبینہ ملی بھگت سے خلافِ ضابطہ تعمیرات کو فروغ مل رہا ہے۔
ان کا کہنا ہے کہ اگر تعمیرات منظور شدہ نقشوں اور مقررہ قوانین کے برخلاف کی جا رہی ہیں تو متعلقہ حکام کو فوری نوٹس لینا چاہیے اور معاملے کی غیر جانب دارانہ تحقیقات کرانی چاہییں۔علاقہ مکینوں نے خدشہ ظاہر کیا کہ تعمیراتی قوانین کو نظرانداز کرنے سے رہائشی علاقوں میں شہری سہولتوں اور تعمیراتی معیار سے متعلق مسائل جنم لے سکتے ہیں۔
انہوں نے مطالبہ کیا کہ مذکورہ پلاٹوں کے منظور شدہ نقشوں، تعمیراتی اجازت ناموں اور موقع پر جاری کام کی مکمل جانچ کی جائے تاکہ اصل حقائق سامنے آ سکیں۔مکینوں نے مزید کہا کہ اگر متعلقہ اداروں کی جانب سے تعمیراتی سرگرمیوں کی مؤثر نگرانی نہ کی گئی تو علاقے میں خلافِ ضابطہ تعمیرات کی حوصلہ افزائی ہو سکتی ہے۔
انہوں نے اعلیٰ حکام سے مطالبہ کیا کہ ناظم آباد میں جاری تعمیراتی کاموں کا موقع پر معائنہ کیا جائے ، قواعد کی خلاف ورزیوں کی نشاندہی کی جائے اور اس امر کو یقینی بنایا جائے کہ کسی بھی عمارت کی تعمیر مقررہ قوانین اور منظور شدہ نقشے کے مطابق ہو۔
علاقہ مکینوں نے ڈائریکٹر جنرل سندھ بلڈنگ کنٹرول اتھارٹی وسیم شمشاد سے مطالبہ کیا ہے کہ معاملے کا فوری نوٹس لیتے ہوئے شفاف اور غیر جانب دارانہ تحقیقات کرائی جائیں۔ ان کا کہنا ہے کہ اگر خلاف ورزی ثابت ہو تو ذمہ دار افراد اور متعلقہ اہلکاروں کے خلاف قانون کے مطابق کارروائی کی جائے ، تاکہ شہر میں غیر قانونی تعمیرات کی روک تھام اور قوانین پر عمل درآمد یقینی بنایا جا سکے ۔
شہریوں نے اس امید کا اظہار کیا کہ اعلیٰ حکام ان شکایات کو سنجیدگی سے لیتے ہوئے حقائق کی جانچ کریں گے اور قانون کی خلاف ورزی ثابت ہونے پر بلاامتیاز کارروائی عمل میں لائی جائے گی۔ ان کے مطابق شفاف تحقیقات اور مؤثر نگرانی ہی کے ذریعے تعمیراتی بے ضابطگیوں کی روک تھام اور متعلقہ اداروں پر عوام کا اعتماد بحال کیا جا سکتا ہے ۔


