پاور شیئرنگ فارمولے پر بلاول کے بیان سے اسحاق ڈار ناراض
شیئر کریں
پاکستان مسلم لیگ (ن) کے سینئر رہنما اور کوارڈی نیشن کمیٹی کے سربراہ سینیٹر اسحاق ڈار نے کہا ہے کہ پاکستان مسلم لیگ (ن) اور پاکستان پیپلز پارٹی کے اکابرین سے درخواست ہے کہ بات چیت کے لئے کمیٹیوں کے درمیان وضع کردہ ضابطے کی پاسداری کریں ،طے ہوا تھا کہ دونوں جماعتوں کی تشکیل کردہ کوارڈی نیشن کمیٹیوں کا کوئی رکن یا رہنما بات چیت کے جاری عمل اور اس میں زیرغور نکات پر بیان بازی نہیں کرے گا ۔ اپنے بیان میں انہوں نے کہا کہ فریقین کے درمیان ابھی تک حتمی نکات طے نہیں پائے اور مختلف تجاویز پر گزشتہ روز تک مشاورت جاری رہی،مشاورت کے چار دور مکمل ہو چکے ہیں اور آج پیر دوپہر پانچویں نشست طے ہو چکی ہے ،آج کے اجلاس میں اہم پیش رفت متوقع ہے ،مشاورت مکمل ہونے پر دونوں جماعتوں کا باضابطہ مشترکہ اعلامیہ جاری ہوگا ۔ انہوں نے کہا کہ دونوں جماعتوں میں طے شدہ طریقہ کار کے مطابق مشاورت مکمل ہونے سے پہلے کوئی بات کرنا مناسب نہیں۔
