قومی سلامتی کمیٹی اجلاس،9مئی کے ذمہ داروں کو کٹہرے میں لانے کا فیصلہ
شیئر کریں
قومی سلامتی کمیٹی کے اجلاس میں فوجی اور نجی املاک کو نقصان پہنچانے والوں کے خلاف قانون کے مطابق کارروائی کا فیصلہ کرلیا گیا۔وزیراعظم شہبازشریف کی زیر صدارت قومی سلامتی کمیٹی کا اجلاس ہوا جس میں وفاقی وزرا اور اعلیٰ عسکری قیادت نے شرکت کی۔ذرائع کے مطابق اجلاس میں 9 مئی کے پرتشدد واقعات کے نقصانات اور کارروائیوں سے متعلق بریفنگ دی گئی۔ذرائع کے مطابق شرکاء کو بتایاگیاکہ سیاسی جماعت کے شر پسندوں نے طے شدہ منصوبے کے تحت یہ سب کیا،واقعات کی ویڈیوز اور شواہد موجود ہیں۔ بتایاگیاکہ توڑ پھوڑ اور جلاؤ گھیراؤ میں ملوث پانچ ہزار سے زائد شرپسندوں کو گرفتار کیا جا چکا ہے۔ ذرائع کے مطابق قومی سلامتی کمیٹی اجلاس میں 9مئی کے پرتشدد واقعات کی شدید مذمت کی گئی اور فیصلہ کیا گیا کہ فوجی اور نجی املاک کو نقصان پہنچانے والوں کے خلاف قانون کے مطابق کارروائی کی جائے گی۔ذرائع نے بتایا کہ قومی سلامتی کمیٹی کے مطابق سیاسی مقاصد کی آڑ میں فوجی املاک کو نقصان پہنچایا گیا، ملکی دفاع اور سلامتی کے اداروں پر حملے نا قابل قبول ہیں۔ذرائع کے مطابق وزیراعظم نے کہاکہ سیاسی مقاصد کیلئے اداروں پر حملہ افسوسناک ہے، قومی حمیت کے حامل جناح ہائوس کو آگ لگائی گئی، 75 سال میں جو دشمن نہ کر سکا وہ ایک سیاسی جماعت کے کارکنان نے کیا۔انہوں نے کہا کہ افواج پاکستان نے پرتشدد واقعات پر تحمل کا مظاہرہ کیا جو قابل ستائش ہے، پوری قوم مسلح افواج کے ساتھ اظہار یکجہتی کرتی ہے۔ذرائع کے مطابق وزیر اعظم نے کہاکہ نو مئی کو یوم سیاہ کے طور پر یاد رکھا جائے گا، فوجی اور سرکاری تنصیبات پر حملے کرنے والے کسی رعایت کے مستحق نہیں۔وزیراعظم نے کہاکہ کسی کو بھی ملک کا امن اور استحکام داؤ پر لگانے کی اجازت نہیں دیں گے۔ انہوںنے کہاکہ پوری قوم مسلح افواج کے ساتھ کھڑی ہے۔ ذرائع کے مطابق اجلاس میں شر پسندوں کے خلاف کیسز کا جلد فیصلہ کرنے کیلئے مختلف آپشنز پر غور کیا گیا ۔ ذرائع کے مطابق قومی سلامتی کمیٹی نے مسلح افواج سے مکمل اظہار یکجہتی کیا ۔انٹیلی جنس کی بنیاد پر حالیہ آپریشنز کو بھی فورم نے سراہا۔ ذرائع کے مطابق اجلاس میں اداروں کے خلاف بیرونی اور اندرونی پروپیگنڈہ کی سخت الفاظ میں مذمت کی گئی ۔ بتایاگیاکہ فوج کی قیادت کے خلاف پروپیگنڈہ مسلح افواج اور پاکستان کے عوام کے درمیان ربط کو ختم کرنے کی سازش ہے۔ ذرائع کے مطابق قومی سلامتی کمیٹی میں عزم کا اظہار کرتے ہوئے کہاگیاکہ مذموم پروپیگنڈے کو پاکستانی عوام کی حمایت سے شکست دی جائے گی۔اجلاس میں سوشل میڈیا کے قواعد و ضوابط اور قوانین پر سختی سے عمل درآمد کی ضرورت پر زوردیا گیا ۔ ذرائع کے مطابق فورم کی جانب سے نو مئی کے ذمہ داروں سے نمٹنے سے متعلق افواج پاکستان کے موقف کی تائید کی گئی ۔فورم نے ملک میں انتشار پھیلانے کو سوچی سمجھی سازش قرار دیا ۔ ذرائع کے مطابق ملک دشمنی میں ملوث عناصر کے ساتھ آئینی ہاتھوں سے نمٹنے کا فیصلہ اور ملک دشمن سرگرمیوں میں ملوث افراد سے کوئی رعایت نہ کرنے کا عزم کا اظہار کیا گیا ۔ ذرائع کے مطابق سیاسی اور عسکری قیادت نے ملکی سلامتی پر کوئی سمجھوتہ نہ کرنے کا فیصلہ کیا ۔ ذرائع کے مطابق فورم نے شہداء کی تذلیل اور مجسموں کی بیحرمتی پر اظہار افسوس کیا ۔اجلاس میں ایک سیاسی جماعت کے موقف کو دشمنوں کی زبان قرار دیا گیا ۔فورم نے ملک کے تمام ستونوں کا مل کر مشکلات کا راستہ تلاش کرنے پر زور دیا ۔قومی سلامتی کمیٹی نے ملک کو معاشی طور پر مستحکم بنانے کے اقدامات پر اطمینان کا اظہار کیا ۔خیال رہے کہ گزشتہ روز آرمی چیف جنرل عاصم منیر کی زیر صدارت خصوصی کور کمانڈرز کانفرنس میں فوجی تنصیبات پر حملہ کرنے والے ملزمان کے خلاف آرمی ایکٹ اور آفیشل سیکرٹ ایکٹ کے تحت ٹرائل کا فیصلہ کیا گیا تھا۔واضح رہے کہ گزشتہ دنوں پاکستان تحریک انصاف کے چیئرمین عمران خان کی گرفتاری کے بعد پی ٹی آئی کارکنوں نے ملک کے مختلف شہروں میں احتجاج اور جلا ئوگھیرا ئوکیا تھا۔پی ٹی آئی کارکنوں نے جناح ہاس لاہور سمیت فوجی تنصیبات، تاریخی عمارتوں، سرکاری املاک اور گاڑیوں کو آگ لگا دی تھی اور پاک فوج نے 9 مئی کو یوم سیاہ قرار دیا۔
