متحدہ پاکستان میں چھپے لندن گروپ کے خلاف آپریشن کی تیاری
شیئر کریں
(رپورٹ: ہارون صدیقی) متحدہ پاکستان میں موجود متحدہ لندن کے دہشت گردوں کے خلاف بڑے انٹیلی جنس آپریشن کی تیاری کرلی گئی ہے متحدہ پاکستان میں 63 ایسے دہشت گردوں کی نشاندہی ہوئی ہے جو متحدہ لندن کے جنوبی افریقہ سیٹ اپ سے رابطے میں ہیں اور متحدہ پاکستان میں رہتے ہوئے متحدہ لندن نیٹ ورک کا حصہ ہیں۔ تحقیقاتی اداروں نے عید سے قبل ایسے 6 ملزمان کو حراست میں لیا ہے جن سے اہم معلومات حاصل ہوئی ہیں۔ تفصیلات کے مطابق انتہائی باخبر ذرائع نے انکشاف کیا ہے کہ کراچی میں متحدہ لندن نے اپنے نیٹ ورک کو فعال کرنا شروع کردیا ہے ذریعے کا کہنا ہے کہ تحقیقاتی اداروں کو ایسی اطلاعات ملی ہیں کہ متحدہ لندن کے حامی بعض دہشت گرد جو ماضی میں پی ایس پی کا حصہ تھے اور بعض ایسے کارکنان جو متحدہ پاکستان کا حصہ ہیں وہ متحدہ لندن کے جنوبی افریقہ سیٹ اپ سے رابطے میں ہیں ذریعے کا کہنا ہے کہ متحدہ لندن کے دہشت گردوں نے انٹیلی جنس اداروں سے بچنے کیلئے متحدہ پاکستان میں پناہ لی ہوئی ہے اور وہ متحدہ پاکستان کی تمام سرگرمیوں سے لندن قیادت کو آگاہ کررہے ہیں ذریعے کا کہنا ہے کہ متحدہ پاکستان میں چھپے متحدہ لندن کے دہشت گردوں کے جنوبی افریقہ میں موجودہ متحدہ لندن کے سیٹ اپ کے دہشت گردوں سے رابطے ہیں اہم ذریعے کا کہنا ہے کہ جب متحدہ پاکستان اور پی ایس پی کا انضمام ہوا تو پی ایس پی کے سابق رہنما انیس احمد قائم خانی کو یہ ٹاسک دیا گیا کہ وہ متحدہ پاکستان میں موجود متحدہ لندن کے دہشت گردوں کا سراغ لگائیں واضح رہے کہ ماضی میں انیس احمد قائم خانی تنظیمی سیٹ اپ چلاتے تھے اور ان کی تنظیمی سیٹ اپ پر مضبوط گرفت تھی ذریعے کا کہنا ہے کہ تحقیقاتی اداروں نے متحدہ پاکستان میں موجود متحدہ لندن کے 63 ایسے دہشت گردوں کی نشاندہی کی ہے جو متحدہ پاکستان میں رہتے ہوئے متحدہ لندن کا حصہ ہیں ذریعے کا کہنا ہے کہ مذکورہ دہشت گردوں کے بارے میں تمام انٹیلی جنس معلومات حاصل کرلی گئی ہیں اور متحدہ پاکستان کی قیادت کو بھی اس حوالے سے اعتماد میں لے لیا گیا ہے اہم ذریعے کا کہنا ہے کہ تحقیقاتی اداروں نے متحدہ پاکستان میں موجود متحدہ لندن کے دہشت گردوں کے خلاف انٹیلی جنس آپریشن کی حکمت عملی تیار کرلی ہے ذریعے کا کہنا ہے کہ تحقیقاتی ادارے انٹیلی جنس معلومات کی بنیاد پر متحدہ پاکستان میں چھپے متحدہ لندن کے دہشت گردوں کے خلاف کارروائی کریں گے اہم ذریعے کا کہنا ہے کہ متحدہ لندن کے دہشت گرد جنوبی افریقہ میں موجود متحدہ کی دہشت گردوں سے بھی ہدایات لے رہے ہیں ایسی معلومات ہیں کہ رمضان المبارک میں متحدہ لندن سے تعلق رکھنے والے 6 دہشت گردوں کو فیڈرل بی ایریا، گلبرگ، ملیر اور کورنگی سے حراست میں لیا گیا تھا جنہوں نے متحدہ لندن کے دہشت گردوں کے حوالے سے اہم انکشافات کئے تھے معلوم ہوا ہے کہ زیر حراست دہشت گردوں نے انکشاف کیا تھا کہ کراچی کے بعض کھیپئے دبئی جاکر وہاں سے متحدہ لندن کا پیغام لے کر آتے ہیں جو وہ کراچی میں روپوش دہشت گردوں کو دیتے ہیں اہم ذریعے کا کہنا ہے کہ تحقیقاتی اداروں کو زیر حراست متحدہ لندن کے دہشت گردوں سے ایسی معلومات بھی ملی تھیں کہ متحدہ لندن کراچی میں متحدہ پاکستان کی قیادت کی ٹارگٹ کلنگ کرانا چاہتی ہے جس پر انٹیلی جنس اداروں نے اپنی کارروائیاں تیز کیں اور متحدہ پاکستان کی قیادت کو بھی احتیاط برتنے کی ہدایت کی تھی ذریعے کا دعویٰ ہے کہ عید سے دو روز قبل تحقیقاتی اداروں نے کراچی سے 2 اور میرپور خاص اور ٹنڈو آدم سے ایک ایک دہشت گرد کو حراست میں لیا ہے جو متحدہ لندن کیلئے کام کررہے تھے ان سے متحدہ لندن کے نیٹ ورک کے حوالے سے اہم معلومات حاصل ہوئی ہیں۔
