پنجاب اسمبلی کا مستقبل : ق لیگ کا پرویز الہٰی پر اظہارِ اعتماد
شیئر کریں
وزیراعلیٰ پنجاب چودھری پرویزالہٰی اور مسلم لیگ قائداعظم کی پارلیمانی پارٹی کے لیڈر ساجد بھٹی کی زیر صدارت وزیر اعلی آفس میں مسلم لیگ قائداعظم کی پارلیمانی پارٹی کا اجلاس منعقد ہواـ اجلاس میں سیاسی صورت حال کا تفصیلی جائزہ لیا گیا اور مستقبل کی حکمت عملی طے کی گئی۔ مسلم لیگ قائد اعظم کی پارلیمانی پارٹی نے وزیراعلیٰ چودھری پرویزالہٰی کی قیادت پر بھرپوراعتماد کا اظہار کیاـ پارلیمانی پارٹی نے تمام فیصلوں کا اختیار وزیراعلیٰ چودھری پرویز الہٰی کو دے دیا ہےـ پارلیمانی پارٹی کے اجلاس میں اس عزم کا اظہار کیا گیا کہ مسلم لیگ قائد اعظم کے تمام اراکین پنجاب اسمبلی تحریک عدم اعتماد پر ووٹنگ کی صورت میں وزیر اعلی پنجاب چودھری پرویزالہٰی، اسپیکر پنجاب اسمبلی سبطین خان اور ڈپٹی اسپیکر واثق قیوم کو ووٹ دیں گےـ چودھری پرویز الہٰی نے اجلاس سے خطاب کرتے ہوئے کہا کہ انشاء اللہ عمران خان کے ساتھ دل و جان سے ہیں اور ساتھ دیتے رہیں گے۔ چودھری پرویز الہٰی نے کہا کہ مسلم لیگ قائداعظم متحد ہے اور متحد رہے گی۔ افواہیں پھیلانے والے مخصوص ایجنڈے پر چل رہے ہیں اوراختلافات کا پراپیگنڈہ کرنے والوں کے مذموم عزائم ناکام ہوں گےـ پارلیمانی لیڈر مسلم لیگ قائد اعظم ساجد بھٹی نے کہا کہ وزیراعلیٰ چودھری پرویز الہٰی کی قیادت میں مسلم لیگ قائداعظم کی پارلیمانی پارٹی متحد اور یک جان ہے۔ سیسہ پلائی دیوار کی طرح وزیراعلیٰ چودھری پرویز الہٰی کے ساتھ کھڑے ہیں اور کھڑے رہیں گے۔ وزیر اعلی پنجاب چودھری پرویزالہٰی ہمارے لیڈر ہیں۔ پوری پارلیمانی، سیاسی اور عوامی قوت کے ساتھ چودھری پرویزالہٰی کے شانہ بشانہ ہیں ـ پارلیمانی لیڈر مسلم لیگ قائداعظم ایم پی اے ساجد بھٹی، حافظ عمار یاسر، شجاعت نواز، محمد عبداللہ وڑائچ، محمد رضوان، احسان الحق، محمد افضل، خدیجہ عمر اور باسمہ چودھری نے اجلاس میں شرکت کی ـ ایم این اے حسین الہٰی بھی اجلاس میں شریک ہوئے۔
