وہ چیخ جو صدیوں سے خاموش ہے!
شیئر کریں
ایک پل پر ایک انسان کھڑا ہے ۔ اس کے دونوں ہاتھ چہرے پر ہیں، آنکھیں خوف سے پھیلی ہوئی ہیں اور منہ ایک ایسی چیخ میں کھلا ہے جس کی آواز کینوس سے باہر نہیں آتی۔ پیچھے آسمان سرخ ہے ، دریا لہروں کی طرح مڑا ہوا ہے ، دنیا اپنی معمول کی شکل کھو چکی ہے ۔ قریب ہی دو لوگ چلتے جا رہے ہیں، مگر وہ مڑ کر بھی نہیں دیکھتے ۔یہ ایڈورڈ منک کی شہرہ آفاق پینٹنگ The Scream ہے ، مگر حقیقت میں یہ ایک شخص کی تصویر نہیں، یہ انسانی تاریخ کی اجتماعی چیخ ہے ۔
انسان نے غاروں سے نکل کر شہر بنائے ، سلطنتیں قائم کیں، مذہب، فلسفہ، سائنس اور ادب پیدا کیا، چاند تک پہنچ گیا، لیکن اس تمام ترقی کے باوجود اس کے اندر ایک خوف آج بھی زندہ ہے ۔ وہی خوف جو کبھی اسے رات کے اندھیرے میں کسی نامعلوم خطرے سے ڈراتا تھا، آج اسے جنگ، تنہائی، بے معنویت، ناکامی، غربت اور مستقبل کے اندیشوں میں مبتلا کرتا ہے ۔شاید اسی لیے The Scream آج بھی ہمیں دیکھتی ہوئی محسوس ہوتی ہے ۔ کیونکہ منک نے ایک چہرہ نہیں بنایا۔ اس نے انسان کی اندرونی حالت کو تصویر میں بدل دیا۔ انسانی نفسیات کا عجیب تضاد ہے کہ انسان بھیڑ میں رہتے ہوئے بھی تنہا ہو سکتا ہے ۔ تاریخ کی بڑی سلطنتوں میں بھی خوف موجود تھا، بادشاہوں کے محلوں میں بھی بے خوابی تھی اور عوام کے گھروں میں بھی۔ سکندر دنیا فتح کرنے نکلا، مگر موت کو شکست نہ دے سکا۔ رومی سلطنت نے نصف دنیا پر اقتدار قائم کیا، مگر اپنے شہریوں کے خوف کو ختم نہ کر سکی۔ بادشاہوں نے قلعے تعمیر کیے ، مگر اپنے اندر کے اندیشوں کے لیے کوئی قلعہ نہ بنا سکے ۔اقتدار اکثر انسان کے بیرونی خوف کو کم کرنے کے بجائے اندرونی خوف بڑھا دیتا ہے ۔ جس کے پاس طاقت ہوتی ہے ، اسے طاقت چھن جانے کا خوف بھی ہوتا ہے ۔ دولت مند کو دولت کھونے کا، مشہور انسان کو گمنام ہونے کا اور حکمران کو اپنے خلاف اٹھنے والی ہر آواز کا خوف لاحق رہتا ہے ۔انسان کبھی کبھی حقیقت سے نہیں، اپنے ذہن میں تخلیق کردہ حقیقت سے لڑ رہا ہوتا ہے ۔یہیں سے خوف ایک فرد کی نفسیات سے نکل کر اجتماعی نفسیات بن جاتا ہے ۔ تاریخ میں جنگیں صرف زمین کے لیے نہیں لڑی گئیں۔ ان کے پیچھے شناخت، عدم تحفظ اور خوف بھی کارفرما رہے ۔ ایک قوم دوسری قوم سے خوفزدہ ہوئی، حکمران عوام سے ، مذہبی گروہ دوسرے گروہوں سے ۔ پھر خوف نے نفرت کو جنم دیا، نفرت نے تشدد کو اور تشدد نے تاریخ کے صفحات کو خون سے بھر دیا۔
انسان کا سب سے خطرناک ہتھیار ہمیشہ تلوار یا بندوق نہیں رہا؛ اس کا خوف بھی رہا ہے ۔ کیونکہ خوفزدہ انسان کو آسانی سے استعمال کیا جا سکتا ہے ۔ اسے بتایا جائے کہ تم خطرے میں ہو، وہ دشمن تلاش کرنے لگتا ہے ۔ اسے بتایا جائے کہ تمہاری شناخت خطرے میں ہے ، وہ اپنی شناخت کے نام پر دوسرے انسان سے نفرت کرنے لگتا ہے ۔ اسے خاموش رہنے کا خوف دکھایا جائے تو وہ اپنے ضمیر تک کو خاموش کر دیتا ہے ۔یہی وہ مقام ہے جہاں The Scream ایک پینٹنگ سے بڑھ کر انسانی تہذیب کی نفسیاتی دستاویز بن جاتی ہے ۔پل پر کھڑا
شخص شاید اس لیے نہیں چیخ رہا کہ دنیا میں کوئی خطرہ موجود ہے ؛ شاید وہ اس لیے چیخ رہا ہے کہ دنیا اسے بے معنی محسوس ہونے لگی ہے ۔جدید انسان کا المیہ بھی یہی ہے ۔ اس کے پاس پہلے سے زیادہ معلومات ہیں، مگر سکون کم ہے ۔ رابطے کے ہزاروں ذرائع ہیں، مگر تنہائی زیادہ ہے۔ ہزاروں ڈیجیٹل دوست ہیں، مگر کبھی کبھی ایک حقیقی انسان سے بات کرنے والا بھی کوئی نہیں ہوتا۔فرائیڈ نے انسانی ذہن میں دبی ہوئی خواہشوں اور خوفوں کی طرف توجہ دلائی، یونگ نے انسان کے اندر موجود ’’سایہ‘‘ دریافت کیا، کیرکیگارڈ نے اضطراب کو انسانی وجود کی گہرائیوں سے جوڑا، کیمُو نے ایک ایسی کائنات میں انسان کو دیکھا جہاں وہ معنی تلاش کرتا ہے مگر کائنات خاموش رہتی ہے ، جبکہ سارتر نے آزادی کو نعمت کے ساتھ ایک بوجھ بھی قرار دیا۔ ان سب کے درمیان ایک بنیادی سوال موجود ہے : انسان اپنے اندر جاری جنگ سے کیسے آزاد ہو؟شیکسپیئر کا ہیملٹ، دوستوئیفسکی کے کردار، کافکا کا انسان، چیخوف کی اداس دنیا اور منک کا چیختا ہوا انسان، سب اسی انسانی المیے کے مختلف چہرے ہیں۔تاریخ بتاتی ہے کہ جب معاشرہ مسلسل خوف میں رہنے لگے تو انسان کی شخصیت بھی بدلنے لگتی ہے ۔ وہ سوال پوچھنے ، اختلاف کرنے ، تنقید کرنے اور سچ بولنے سے ڈرتا ہے ۔ آہستہ آہستہ خوف صرف زبان کو خاموش نہیں کرتا بلکہ خیال کو بھی قید کر دیتا ہے ۔ معاشرہ باہر سے زندہ مگر اندر سے مردہ دکھائی دینے لگتا ہے ۔
پاکستانی تاریخ اور معاشرہ بھی اس نفسیات سے الگ نہیں۔ یہاں کئی نسلوں نے سیاسی بے یقینی، معاشی دباؤ، تشدد، دہشت گردی، ناانصافی، بے روزگاری اور مستقبل کے غیر یقینی سوالات کے درمیان زندگی گزاری ہے ۔ عام پاکستانی کے لیے خوف کبھی روزگار کا مسئلہ ہے ، کبھی بچوں کے مستقبل کا، کبھی مہنگائی کا اور کبھی طاقتور کے سامنے بے بسی کا۔لیکن سب سے خطرناک خوف وہ ہے جب انسان یہ سمجھنے لگے کہ کچھ بھی تبدیل نہیں ہو سکتا۔ اس مقام پر وہ صرف احتجاج نہیں چھوڑتا، امید کرنا بھی چھوڑ دیتا ہے ۔ہمارا المیہ شاید یہی ہے کہ ہم نے بہت سے دکھوں کو معمول سمجھنا شروع کر دیا ہے ۔ ناانصافی بار بار ہو تو انسان اسے قسمت کہنے لگتا ہے ، جھوٹ مسلسل بولا جائے تو سچ غیر معمولی محسوس ہونے لگتا ہے اور خوف طویل ہو جائے تو خاموشی دانش مندی دکھائی دینے لگتی ہے ۔یہ وہ نفسیاتی مقام ہے جہاں The Scream کا پل ہمارے اپنے معاشرے کا پل بن جاتا ہے ۔تصویر میں موجود دو خاموش لوگ بھی ہمیں ایک تلخ سوال دیتے ہیں۔اگر ایک انسان ہمارے سامنے چیخ رہا ہو اور ہم خاموشی سے آگے بڑھ جائیں تو کیا ہم محض تماشائی ہیں یا ہماری خاموشی بھی کسی اخلاقی جرم کا حصہ ہے ؟ انسانی تاریخ میں ظلم صرف ظالموں نے نہیں بڑھایا؛ کئی مرتبہ وہ خاموش تماشائیوں کی موجودگی سے بھی مضبوط ہوا۔ خوفزدہ معاشرے میں لوگ اپنے ضمیر کو بچانے کے لیے دوسروں کی چیخوں سے نظریں چرا لیتے ہیں۔ مگر تاریخ کا المیہ یہ ہے کہ چیخیں دفن نہیں ہوتیں۔ وہ ادب، شاعری، مصوری اور تاریخ کی کتابوں میں واپس آتی ہیں، کبھی آنے والی نسلوں کے سوال بن کر۔منک نے ایک چیخ کو کینوس پر قید کیا تھا، مگر وہ چیخ آج بھی آزاد ہے ۔ وہ جنگوں کے بعد سنائی دیتی ہے ، جیلوں کی خاموش دیواروں میں گونجتی ہے ، بھوکے بچے کی آنکھوں میں دکھائی دیتی ہے ، بے روزگار نوجوان کے چہرے پر لکھی ہوتی ہے اور اس ماں کے دل میں زندہ رہتی ہے جو اپنے بچے کے مستقبل سے خوفزدہ ہے ۔ شاید The Screamکا سب سے بڑا پیغام یہی ہے کہ انسان کو ہمیشہ دشمن سے نہیں بچانا ہوتا۔ کبھی کبھی اسے اس خوف سے بچانا ہوتا ہے جو اسے اپنے ہی اندر قید کر دیتا ہے۔ تہذیب کی اصل کامیابی یہ نہیں کہ ہم کتنی بلند عمارتیں بناتے ہیں، کتنے ہتھیار تیار کرتے ہیں یا کتنی طاقت حاصل کرتے ہیں۔ اصل کامیابی یہ ہے کہ ہم ایسا معاشرہ بنا سکیں جہاں انسان کو اپنی بات کہنے کے لیے چیخنا نہ پڑے ، اختلاف غداری نہ ہو، سوال جرم نہ ہو، غربت تقدیر نہ ہو اور انصاف طاقت کا محتاج نہ ہو۔جہاں ایک انسان کی چیخ سن کر باقی انسان راستہ بدل کر نہ گزریں۔ ورنہ تاریخ کے کسی خاموش پل پر ایک دن ہم سب کھڑے ہوں گے ، ہاتھ اپنے چہروں پر ہوں گے ، آنکھیں خوف سے پھیلی ہوں گی اور شاید پوری انسانیت ہم سے یہی پوچھ رہی ہوگی: تم نے چیخ کیوں نہیں سنی؟
٭٭٭
