نارتھ کراچی ،مقروض باپ نے 3بچوں سمیت خود کو آگ لگالی
شیئر کریں
نارتھ کراچی کے علاقے سیکٹر فائیو سی فور میں گرائونڈ کے اندر باپ نے 3بچوں سمیت خود کو آگ لگالی،واقعہ کی اطلاع ملتے اہل محلہ جمع ہوگیا اور اپنی مدد آپ کے تحت آگ بجھا کر ایمبولینس کے ذریعے فوری طبی امداد کے لیے سول اسپتال برنس وارڈ منتقل کر دیا۔خواجہ اجمیر نگری پولیس کے مطابق نارتھ کراچی سیکٹر فائیو سی فور مکان نمبر ایل 246 میں رہائش پذیر 45 سالہ عارف ولد بشیر نے اپنے 3 بچوں کے ہمراہ گھر کے قریب آکلینڈ گرائونڈ میں لیجا کر خود سوزی کی ہے جس کے باعث 45 سالہ عارف اس کی 2 بیٹیاں 4 سالہ ایمان فاطمہ اور 5 سالہ حوریہ جبکہ بیٹا 3 سالہ غلام حسین جھلس کر شدید زخمی ہوگئے۔رپورٹس کے مطابق عارف کوسول اسپتال منتقل کیاگیاجہاں وہ زخموں کی تاب نہ لاکرجان کی بازی ہار گیا ، متوفی کی لاش کو سول اسپتال برنس وارڈ سے سرد خانے منتقل کردیاگیاجبکہ تینوں بچے نیشنل انسٹیٹیوٹ آف چائلڈ ہیلتھ میں زیر علاج ہیں۔عارف کی ساس نے بتایا کہ تینوں بچے عارف کی پہلی بیوی سے ہیں جوکہ انتقال کرگئی ہے۔انہوں نے بتایا کہ عارف اور بچے دوسری بیوی کے ساتھ رہ رہے تھے، عارف کوئی کام نہیں کرتا، لوگوں کا مقروض بھی تھا۔عارف کے سوتیلے بیٹے امان نے میڈیا سے گفتگو کرتے ہوئے بتایا کہ اسکا باپ ذہنی طور پر پریشان تھا۔ جھلسنے والے تینوں بچے عارف کی سگی اولاد ہیں، جھلسنے والے بچوں کی والدہ کا8ماہ قبل انتقال ہوگیا تھا۔امان نے بتایاکہ ہمارا سوتیلا والد کوئی بھی کام نہیں کر رہا تھا، عارف اور اس کے بچے کئی ماہ سے ان کے ساتھ رہ رہے تھے، آج گھر میں کھانے کے بعد عارف بچوں کو لے کر نیچے اترا، معلوم نہیں عارف نے یہ انتہائی قدم کیوں اٹھایا۔عارف کے سوتیلے بیٹے حماد نے جناح اسپتال میں میڈیا سے گفتگو کرتے ہوئے بتایا کہ ہم کام پر تھے جب واقعے کی اطلاع ملی۔والد کو پیسوں کی کوئی پریشانی نہیں تھی، ہم کماتے اور والد کا خرچہ پورا کرتے ہیں، تین چار دن سے والد پریشان تھے، وہ راتوں کو اٹھ کر بیٹھ جاتے تھے، کھانا بھی صحیح نہیں کھا رہے تھے۔پولیس حکام نے بتایا کہ ابتدائی تحقیقات میں 3 بچوں سمیت خود سوزی کرنے والا عارف فروٹ کا ٹھیلا لگاتا ہے جس نے 2 شادیاں کی ہوئی ہیں
