سندھ میں جعلی ڈاکٹروں کیخلاف گھیرا تنگ ، درجنوں کلینک سیل
شیئر کریں
سندھ حکومت نے صوبے مختلف شہروں میں اتائی ڈاکٹروں کیخلاف موثر کارروائی کرتے ہوئے درجنوں کلینک سیل کردیئے ہیں۔سندھ ہیلتھ کیئر کمیشن نے کراچی، حیدرآباد، شکارپور، نوابشاہ، کشمور اور عمرکوٹ سمیت دیگر شہروں میں عوام کی جانوں سے کھیلنے والے اتائی ڈاکٹروں کے گرد گھیرا تنگ کردیا۔محکمہ کے تابڑ توڑ چھاپوں کے دوران47 کلینک سیل کردیے گئے جن میں ایسے کلینک بھی شامل ہیں جو پہلے سے سیل شدہ ہو نے کے باوجود دوبارہ کھلے ہوئے تھے، چھاپے کے وقت اتائی ڈاکٹرز اپنے کلینکوں سے غائب تھے۔اس حوالے سے سندھ ہیلتھ کیئر کمیشن کے سی ای او سید باقر رضا رضوی نے گفتگو کرتے ہوئے بتایاکہ صوبے میں ان اتائی ڈاکٹروں کی تعداد تقریبا ایک لاکھ سے زائد ہے۔انہوں نے کہا کہ جب سے یہ محکمہ وجود میں آیا ہے تب سے اب تک 4 ہزار 421 اتائی ڈاکٹروں کیخلاف کارروائی کی گئی ہے۔ شہر کراچی کے علاوہ اندرون سندھ ایسے ڈاکٹروں کی تعداد بہت زیادہ ہے۔
