ایکسپریس وے منصوبہ 30دسمبر تک ہر صورت مکمل ہونا چاہئے،مراد علی شاہ
شیئر کریں
وزیراعلیٰ سندھ مراد علی شاہ اتوار کی صبح بغیر پروٹوکول اچانک ملیر ایکسپریس وے کا دورہ کرنے پہنچ گئے۔ انہوں نے جام صادق پل سے شاہ فیصل انٹرچینج تک نو کلومیٹر حصے کا معائنہ کیا اور دسمبر کے آخر تک کام مکمل کرنے کی ہدایت کی تاکہ ایکسپریس وے کو ٹریفک کے لیے کھولا جا سکے۔مراد علی شاہ نے انجینئر خالد منصور کو کام تیز کرنے کی ہدایت کرتے ہوئے کہا کہ 30دسمبر تک منصوبہ ہر صورت مکمل ہونا چاہیے۔ انہوں نے شاہ فیصل انٹرچینج سے ایئرپورٹ تک ایکسپریس وے کے ساتھ تمام غیرقانونی تعمیرات اور پارکنگ ختم کرنے کی اہمیت پر زوردیا تاکہ ٹریفک کی روانی کو یقینی بنایا جاسکے۔ انہوں ںے کمشنر کراچی، ڈی آئی جی پولیس اور ڈی ایم سی نمائندوں کو تجاوزات کے بارے میں خبردار کیا۔وزیراعلیٰ نے کہاکہ ملیر ایکسپریس وے کی وجہ سے جام صادق پل سے جناح ٹرمینل براستہ شاہ فیصل ٹرمینل سفر کم ہو کر 15 منٹ کا رہ جائیگا۔ انہوں نے ایک بار پھر شاہ فیصل ٹرمینل سے ایئرپورٹ تک تمام تجاوزات کے خاتمے کا اپنا عزم دہرایا۔مراد علی شاہ نے اعلان کیا کہ یہ ایکسپریس وے ہے، اس پر موٹرسائیکل اور چنگچی رکشہ کو اجازت نہیں ہوگی۔ ہیوی ٹریفک کو مینج کرنے اور حفاظتی اقدامات کے لیے سیکیورٹی چیک پوسٹ بنائے جائیں گے۔ایکسپریس وے کی مسافر اور مال گاڑیوں کے لیے اہمیت کو اجاگر کرتے ہوئے وزیراعلیٰ سندھ نے کہا کہ یہ شاہ فیصل ، ایئرپورٹ، شاہراہ فیصل اور نیشنل ہائی وے کو جوڑتا ہے۔ انہوں نے حکام کو ہدایت کی کہ ان کے آنے سے پہلے پورے ایکسپری وے پر اسٹریٹ لائٹس نصب کرکے روشن کردیں۔ منصوبہ کراچی کے دیرینہ ٹریفک جام کے مسئلے اور شہر کے مختلف حصوں کو جوڑنے کے حوالے سے اہم ہے۔
