کراچی پولیس حملہ کیس، دہشت گردوں کی گاڑی کا 9 واں مالک بھی سامنے آگیا
شیئر کریں
کراچی پولیس آفس حملہ کیس میں دہشت گردوں کی زیر استعمال گاڑی کا 9 واں مالک بھی سامنے آگیا جبکہ تفتیشی حکام نے شورم کے مالک کا بیان قلمبند کرلیا۔تفصیلات کے مطابق کراچی پولیس آفس پر حملے میں دہشت گردوں کی جانب سے استعمال کی جانی والی انڈس کرولا کار کو آخری بار فروخت کرنے والا ملیر میں قائم شوروم کا مالک اشفاق تفتیشی ٹیم کے سامنے پیش ہوگیا۔ذرائع کا کہنا ہے کہ اشفاق نے اپنے بیان میں بتایا کہ مذکورہ کار آخری بار 2016 میں شفیق نامی شخص کو فروخت کی تھی جو کہ کوئٹہ کا رہائشی ہے تاہم میرے پاس گاڑی کی خرید و فروخت کے معاہدے اور دستاویزات موجود نہیں ہے شاید کہیں کھو گئے ہیں جسے میں نے کافی تلاش کیا لیکن وہ نہیں مل سکے۔تفتیشی ذرائع کے مطابق دستاویزات نہ ہونے کی وجہ سے تفتیش میں مشکلات کا سامنا کرنا پڑ رہا ہے تاہم کار کے آخری مالک شفیق سے رابطے اور اس کی تلاش کے لیے کار شوروم کے مالک اشفاق سے مدد لی جا رہی ہے۔واضح رہے کہ اس قبل مذکورہ کار 8افراد کو فروخت کی گئی تھی اور شفیق کار کے 9واں مالک کے طور پر سامنے آیا ہے اور اس کے بعد کار کو مزید کتنے افراد نے خریدا اس کا تعین تو شفیق کے سامنے آنے کے بعد ہی ہو سکے گا کہ پولیس کو مزید کتنے کار کے خریداروں کا سراغ لگانا پڑیگا۔تفتیشی حکام کا کہنا ہے کہ کار کے آخری مالک تک پہنچنے کے بعد ہی اس بات کا تعین ہوگا کہ دہشت گردوں کے پاس کار کہاں سے اور کیسے آئی اس کا خریدار کون تھا اور اس تمام عمل میں کتنا وقت لگے گا اس حوالے سے کچھ کہنا قبل از وقت ہوگا۔
