سگریٹ نوشی کے بغیر بھی پھیپھڑے متاثر کرنے والی 7 عادات
شیئر کریں
فضائی آلودگی، گھر کا دھواں، کیمیکلز اور غیر فعال طرز زندگی سانس کی صحت متاثر کرسکتے ہیں
مسلسل کھانسی اور سانس پھولنے کو نظر انداز نہ کریں،ماہرین
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پھیپھڑوں کی صحت صرف سگریٹ نوشی سے پرہیز کرنے تک محدود نہیں، روزمرہ زندگی میں بعض عادات اور ماحولیاتی عوامل بھی سانس کے نظام کو متاثر کرسکتے ہیں۔
ماہرین کے مطابق فضائی آلودگی، گھر کے اندر دھواں، کام کی جگہ پر دھول اور کیمیکلز، دوسروں کے سگریٹ کا دھواں اور جسمانی سرگرمی کی کمی جیسے عوامل طویل عرصے میں سانس کی صحت کے لیے نقصان دہ ہوسکتے ہیں۔
ٹریفک، صنعتی اخراج اور ہوا میں موجود باریک ذرات سانس کی نالیوں میں جلن پیدا کرسکتے ہیں، جس کے نتیجے میں کھانسی، گھرگھراہٹ یا سانس لینے میں دشواری ہوسکتی ہے۔
ایسے ماحول میں کام کرنے یا روزانہ کئی گھنٹے گزارنے والے افراد کو حفاظتی تدابیر اختیار کرنی چاہئیں۔ کھانا پکانے کا دھواں، لکڑی یا دیگر ایندھن جلانے سے پیدا ہونے والے ذرات، اگربتی اور مچھر مار کوائل سمیت کمروں میں دھوئیں کے مختلف ذرائع اندرونی فضائی آلودگی بڑھا سکتے ہیں۔
مناسب ہوا کی آمدورفت اور باورچی خانے میں مؤثر نکاسی کا انتظام اس خطرے کو کم کرنے میں مددگار ہوسکتا ہے۔تعمیرات، کارخانوں، مینوفیکچرنگ اور بعض دیگر شعبوں سے وابستہ افراد کو دھول، کیمیائی بخارات اور صنعتی ذرات کا سامنا ہوسکتا ہے۔
طویل مدتی نمائش سانس سے متعلق بیماریوں کا خطرہ بڑھا سکتی ہے، اس لیے کام کی جگہ کے حفاظتی اصولوں اور حفاظتی سامان کا استعمال ضروری ہے۔سیکنڈ ہینڈ اسموک بھی سانس کے نظام کے لیے نقصان دہ ہوسکتا ہے۔
گھر، گاڑی اور دیگر مشترکہ جگہوں کو تمباکو کے دھوئیں سے پاک رکھنا بالخصوص بچوں، بزرگوں اور سانس کے مسائل سے دوچار افراد کے لیے اہم ہے۔پینٹ، سالوینٹس اور بعض صفائی کی مصنوعات سے خارج ہونے والے بخارات سانس کی نالی میں جلن پیدا کرسکتے ہیں۔
ان مصنوعات کے استعمال کے دوران مناسب وینٹیلیشن اور متعلقہ حفاظتی ہدایات پر عمل کرنا ضروری ہے۔جسمانی سرگرمی کی کمی براہ راست پھیپھڑوں کو نقصان پہنچانے والا عامل نہیں، تاہم اس سے مجموعی جسمانی اور قلبی تنفس کی فٹنس متاثر ہوسکتی ہے۔
باقاعدہ جسمانی سرگرمی جسم کی برداشت اور سانس کی مجموعی صلاحیت برقرار رکھنے میں مدد دیتی ہے۔مسلسل کھانسی، سانس میں گھرگھراہٹ، سینے میں تکلیف یا بلاوجہ سانس پھولنے کو معمولی سمجھ کر نظر انداز نہیں کرنا چاہیے۔
ایسی علامات دمے، سانس کی نالی کے مسائل، انفیکشن یا دیگر طبی وجوہات سے بھی وابستہ ہوسکتی ہیں۔ماہرین کے مطابق پھیپھڑوں کو صحت مند رکھنے کے لیے صاف ہوا میں سانس لینا، گھر میں مناسب وینٹیلیشن، کام کی جگہ پر حفاظتی اصولوں کی پابندی اور جسمانی سرگرمی کو معمول کا حصہ بنانا مفید ہے۔
اگر سانس سے متعلق علامات مسلسل رہیں یا بار بار ظاہر ہوں تو بروقت طبی معائنہ کرانا چاہیے۔
