سپریم کورٹ میں فیصل واوڈا کا ایک اور جھوٹ پکڑا گیا
شیئر کریں
سپریم کورٹ آف پاکستان میں پاکستان تحریک انصاف کے رہنما اور سابق وفاقی وزیر محمد فیصل واوڈا کا ایک اور جھوٹ پکڑا گیا۔ فیصل واوڈا کی جانب سے امریکی شہریت نہ چھوڑنے اور 2018میں ریٹرننگ افسر کو 2015 میں ایکسپائر ہونے والا پاسپورٹ دکھائے جانے کا انکشاف ہوا ہے۔ اس بات کی نشاندہی بدھ کے روز سپریم کورٹ میں فیصل واوڈا کی تاحیات نااہلی کے الیکشن کمیشن کے فیصلہ کے خلاف اپیل کی سماعت کے دوران جسٹس عائشہ اے ملک کی جانب سے کی گئی۔ چیف جسٹس آف پاکستان جسٹس عمرعطا بندیال کی سربراہی میں جسٹس سید منصور علی شاہ اور جسٹس عائشہ اے ملک پر مشتمل تین رکنی بینچ نے فیصل واوڈا کی اپیل پر سماعت کی۔ دوران سماعت فیصل واوڈا کے وکیل بیرسٹر وسیم سجاد نے عدالت کو بتایا کہ ریٹرننگ افسر نے منسوخ امریکی پاسپورٹ دیکھ کر تسلی کی۔ اس پر جسٹس عائشہ اے ملک نے وسیم سجاد کو مخاطب کرتے ہوئے کہا کہ جس منسوخ شدہ پاسپورٹ پر آپ انحصار کر رہے ہیں وہ ایکسپائر تھا۔ جسٹس سید منصور علی شاہ کا کہنا تھا کہ فیصل واوڈا کا ایک اور جھوٹ سامنے آ گیا ہے۔ چیف جسٹس عمرعطا بندیال کا کہنا تھا کہ معاملہ تو بہت سنجیدہ ہو گیا ہے، منسوخ شدہ اور ریکارڈ پر موجود پاسپورٹ کے نمبر مختلف ہیں۔ جسٹس عائشہ ملک کا کہنا تھا کہ منسوخ شدہ پاسپورٹ شہریت چھوڑنے کا ثبوت کس طرح ہوسکتا ہے؟ نیا پاسپورٹ بنوائیں تو پرانے پر منسوخی کی مہر لگتی ہے، آراو کو دکھایا جانے والا پاسپورٹ 2015 میں ایکسپائر ہو چکا تھا۔ جسٹس عائشہ ملک کا کہنا تھا کہ زائدالمیعاد پاسپورٹ کے بعد فیصل واوڈا کو نیا امریکی پاسپورٹ جاری ہوا۔ عدالت نے قرار دیا کہ کاغذات نامزدگی جمع کرواتے وقت فیصل واوڈا نے امریکی شہریت نہیں چھوڑی تھی۔ معیاد پوری ہونے پر پاسپورٹ کی تنسیخ اور شہریت چھوڑنے میں فرق ہے۔ عدالت نے قرار دیا کہ شہریت چھوڑنے کے لئے باقاعدہ بیان اور سرٹیفیکیٹ دینا پڑتا ہے۔ جسٹس سید منصور علی شاہ نے فیصل واوڈا کے وکیل سے مکالمہ کرتے ہوئے کہا کہ ان سوالات کے جواب آپ کو نہیں ملنے۔ فیصل واودا کے وکیل نے مزید تیار ی کے لیے وقت مانگ لیا جس کے بعد عدالت نے کیس کی مزید سماعت آئندہ ہفتے تک ملتوی کر دی۔
