کچرا کنڈی سے انسانی اعضا برآمد،سکھر سے ایک ملزم گرفتار
شیئر کریں
شہر قائد کے علاقے نیو کراچی کے قریب کچرا کنڈی سے انسانی اعضا ملے ہیں۔ پولیس کا کہنا ہے کہ واقعہ غیرت کے نام پر لرزہ خیز قتل کی واردات ہے ، کارروائی کرکے ایک ملزم کو گرفتار کرلیا گیا۔پولیس کے مطابق نیو کراچی کے قریب ایک کچرا کنڈی سے انسانی اعضا ء ملے ۔ مقتول کو غیرت کے نام پر قتل کیا گیا تھا اور بعد ازاں اس کی لاش کے ٹکڑے کر کے کچرا کنڈی میں پھینکے گئے ۔ پولیس کے مطابق انسانی اعضا 2 جون کو لاپتا ہونے والے حق نواز کے ہیں، جوعائشہ نامی ملزمہ کی نشان دہی پر برآمد ہوئے ۔حق نواز نامی شہری کی گمشدگی کی رپورٹ تھانہ بلال کالونی میں درج کی گئی تھی۔تفتیشی حکام کا کہنا ہے کہ مقتول کی عائشہ نامی خاتون سے دوستی تھی۔ پولیس کو عائشہ کے گھر پر کارروائی میں پتا چلا کہ دیگر ملزمان اندرون سندھ اور پنجاب فرار ہوئے ، جس پر سکھر میں کارروائی کر کے ایک ملزم کو گرفتار کر لیا گیا ہے ۔ گرفتار ہونے والی ملزمہ نے حق نواز کو قتل کرنے کا اعتراف کر لیا۔واقعے میں ملوث مرکزی ملزم پنجاب فرار ہے جس کی تلاش جاری ہے ۔
