کورولش عثمان کے دو اہم اداکاروں نے آپس میں شادی کر لی
شیئر کریں
اسلامی فتوحات پر مبنی عالمی شہرت یافتہ ترک سیریز کورولش عثمان میں اہم کردار نبھانے والے دو اداکاروں نے آپس میں شادی کرلی۔ کورولش عثمان میں سپاہی جیرکوتائی اور آئیگْل خاتون کا کردار نبھانے والی اداکارہ بوسے ارسلان اور اداکار جاگری سینسوئے نے کئی عرصہ رشتے میں رہنے کے بعد اب شادی کرلی۔ میڈیا رپورٹس کے مطابق دونوں ڈرامہ کے سیٹ پر ایک دوسرے کی محبت میں گرفتار ہوئے تھے اور اب وہ رشتہ ازدواج میں منسلک ہو گئے جن کی تصاویر دونوں نے اپنے انسٹا گرام اکاؤنٹس پر شیئر کیں۔ اداکار جوڑے کی شادی میں قریبی رشتے داروں اور دوستوں نے شرکت کی جب کہ کورولش عثمان میں عثمان کا کردار نبھانے والے اداکار براک نے بھی شرکت کی اور تقریب میں رقص بھی کیا۔ ترک میڈیا کے مطابق بوسے ارسلان اور اداکار جاگری سینسوئے نے کچھ ماہ قبل منگنی کی تھی۔ آئیگْل خاتون (بوسے ارسلان) کورولش عثمان کے تین سیزنز میں نظر آئیں، پہلے ان کا کردار قدرے منفی تھا جب کہ دوسرے سیزن سے انہیں عثمان کے سپاہیوں میں شامل دیکھا گیا۔ سیزن تین کے اختتام پر آئیگْل خاتون کو شہید ہوتے دکھایا گیا۔ دوسری جانب سپاہی جیرکوتائی (جاگری سینسوئے) سیریز کی شروعات میں منگولوں کا سپاہی تھا جس نے بعد ازاں اسلام قبول کیا اور عثمان کے قریبی ساتھیوں اور سپاہیوں میں شامل ہو گیا۔سیریز میں بھی آئیگْل خاتون اور سپاہی جیرکوتائی ایک دوسرے کی محبت میں گرفتار ہونے کے بعد شادی کر لیتے ہیں۔
