کالعدم بی ایل اے کا حملہ ، پاک فوج کے سات جوان شہید
شیئر کریں
پاک فوج کی گاڑی پر سڑک کے کنارے بم حملہ مچھ کے علاقے میں ہوا، سرچ آپریشن شروع
قوم اور فوج مل کربھارت اور اس کے پراکسی کو پاکستانی سر زمین پر شکست دینگے، آئی ایس پی آر
پاک فوج نے کہاہے کہ بھارت کی پراکسی کالعدم تنظیم بلوچستان لبریشن آرمی کے بلوچستان کے ضلع کچھی میں ایک حملے میں پاک فوج کے سات بہادر جوان شہید ہوگئے ہیں ۔ آئی ایس پی آر کے بیان کے مطابق پاک فوج کی گاڑی پر سڑک کے کنارے بم حملہ مچھ کے علاقے میں ہوا ۔ شہید ہونے والوں صوبیدار عمر فاروق عمر 42سال سکنہ کراچی، نائیک آصف خان عمر 28سال سکنہ کرک ، نائیک مشکور علی عمر 28سال سکنہ اور کزئی ، سپاہی طارق نواز عمر 26سال سکنہ لکی مروت ، سپاہی واجد احمد فیض عمر 28سال سکنہ ضلع باغ ، سپاہی محمد عاصم عمر 22سال سکنہ کرک اور سپاہی محمد کاشف خان عمر 28سال سکنہ کوہاٹ شامل ہیں ۔بیان کے مطابق حملے کے بعد دہشت گردوں کے خاتمے کیلئے علاقے میں سرچ آپریشن شروع کر دیا گیا تاکہ اس بزدلانہ جرم میں شریک دہشت گردوں کو انصاف کے کٹہرے میں لایا جاسکے ۔ بیان میں کہاگیاکہ پاکستان کی سکیورٹی فورسز قوم کی حمایت سے بلوچستان کے امن ، ترقی و استحکام سبوتاژکرنے کی کوششوں کو ناکام بنانے کیلئے پر عزم ہیں ، ایسی قربانیاں بہادر فوجیوں کے حوصلے اور عزم کو مضبوط کریں گی۔ بیان میں کہاگیاکہ قوم اور فوج مل کر بھارت اور اس کے پراکسی کو پاکستانی سر زمین پر شکست دینگے ۔
