ایم کیوایم کے دفتر میں آتشزدگی۔فطرہ،چندے کی رسیدیں،فائلیں جل کر راکھ
شیئر کریں
کراچی کے علاقے عزیز آباد میں خورشید بیگم میموریل ہال کے قریب واقع ایم کیو ایم کے بند دفتر میں آتشزدگی سے فطرہ، چندے کی رسیدیں، فائلیں جل کر راکھ ہوگئیں۔ فائر بریگیڈکی گاڑیوں نے ایک گھنٹہ جدوجہد کے بعد آگ پر قابو پایا۔پولیس حکام کے مطابق آگ خورشید بیگم میموریل میڈیکل سینٹر کے ایڈمن آفس میں لگی،جو گزشتہ دو برس سے بند تھا۔حکام کا کہنا ہے کہ بند سینٹر کا بجلی کا کنکشن بھی منقطع تھا،تاہم آگ لگنے کی وجوہات کا تاحال پتہ نہیں لگ سکا،اس حوالے سے تفتیش شروع کردی گئی ہے ۔حکام کے مطابق اسٹور میں موجود کتابیں،فائلیں،فرنیچر،زکوة اور فطرے کی رسیدیں آتشزدگی کی نذر ہوگئی ہیں۔ بچ جانے والی کتابیں،فائلیں اور دیگر دستاویز قبضے میں لی گئی ہیں جبکہ آگ پر قابو پانے کے بعد کولنگ کا عمل جاری ہے ۔آگ کی اطلاع ملنے پر فائربریگیڈ کی گاڑیاں موقع پر پہنچ گئیں اور ایک گھنٹے کی جدوجہد کے بعد آگ پر قابو پالیا۔
