آئندہ سال گرمیوں میںلوڈشیڈنگ نہیں ہوگی'وزیرخزانہ
شیئر کریں
وزیر خزانہ مفتاح اسمعٰیل نے کہا ہے کہ آئندہ سال گرمیوں میں لوڈشیڈنگ نہیں ہوگی اور زرمبادلہ کے ذخائر میں بھی بہتری آجائے گی، پاکستان کے اچھے دن آگئے ہیں ،سب کو ملکر کام کر نام ہوگا ، مہنگائی کم کرینگے ،بیس فیصد نہیں رہے گی ،دوست ممالک سے ہمیں 4 ارب ڈالر کے ڈپازٹس 2 حصوں میں ملیں گے اور ایک دوست ملک سے ایک ارب 20 ڈالر کی تیل کی سہولت ملے گی، ایک دوست ملک پاکستان میں اسٹاک ایکسچینج میں ڈیڑھ سے 2 ارب ڈالر کی سرمایہ کاری کرے گا،پی ٹی آئی حکومت کی طرح ان ڈائریکٹ ٹیکس لگانے کی بجائے ہم نے ڈائریکٹ ٹیکس لگائے، میں نے وزیراعظم کے بیٹوں کی فیکٹری پر 10 فیصد زیادہ ٹیکس لگایا، انشا اللہ ہم ٹیکس کلیکشن کے طے کردہ ہدف سے بھی زیادہ ٹیکس جمع کرکے دکھائیں گے،کبھی کبھی عالمی قیمتوں میں اونچ نیچ ضرور آئے گی اس وقت میں آپ کے سامنے ضرور حاضر ہوں گا پھر آپ بے شک مجھ پر میمز بنا لیجئے گا مگر ہم معاشی استحکام ضرور لے کر آئیں گے۔وفاقی وزرا ء کے ہمراہ پریس کانفرنس کرتے ہوئے مفتاح اسمعٰیل نے کہا کہ میں یقین سے کہہ سکتا ہوں کہ پاکستان کے اچھے دن آگئے ہیں تاہم ہم سب کو اب ذرا مل کر کام کرنا ہوگا، میں آپ سے وعدہ کررہا ہوں کہ مہنگائی کو ہم کم کریں گے، یہ 20 فیصد مہنگائی نہیں رہے گی۔انہوں نے کہا کہ ملک کے معاشی مسائل کی وجہ محض پی ٹی آئی حکومت کی جانب سے پیٹرول پر سبسڈی نہیں بلکہ ان کی 4 سال کی پالیسیوں کا تسلسل ہے، پی ٹی آئی حکومت نے پہلے 3 سال میں 3500 ارب روپے کا ہر سال خسارہ کیا اور ان کے آخری سال میں 5100 ارب روپے کا خسارہ تھا۔وزیرخزانہ نے کہا کہ پونے 4 سال میں عمران خان نے ملک پر 20 ہزار روپیہ قرضہ بڑھایا، پاکستان کے 71 برسوں میں ملک پر 25 ہزار ارب روپے کا قرضہ تھا جبکہ عمران خان کے پونے 4 سال میں ملک پر 20 ہزار ارب روپیہ قرضہ بڑھ گیا۔مفتاح اسمعٰیل نے کہا کہ پی ٹی آئی حکومت میں ریکارڈ بجٹ خسارہ بڑھا جس کے سبب کرنٹ اکاؤنٹ خسارے میں بھی اضافہ ہوا، ان کے دور میں ٹیکس محصولات بھی کم ہوئیں، یہ 4 سال میں ٹیکس محصولات اس سطح پر بھی نہیں لا سکے جہاں مسلم لیگ (ن) چھوڑ کر گئی تھی۔
