کراچی کی 70 فیصداسٹریٹ لائٹس بند، شہری ڈاکوئوں کے رحم وکرم پر
شیئر کریں
بلند بانگ دعوئوں کے باوجود شہر قائد کا کوئی پرسان حال نہیں، یہاں کی 70فیصد اسٹریٹس لائٹس بند پڑی ہیں۔تفصیلات کے مطابق کراچی کی ستر فیصد اسٹریٹ لائٹس بند ہیں، کے ایم سی اور ڈی ایم سیز کے ذمہ داران اور متعلقہ ڈپارٹمنٹ کی نااہلی کے باعث رات بھر اندھیرا چھایا رہتا ہے۔سینئر بلدیاتی افسروں کے مطابق چیک اینڈ بیلنس نہ ہونے کی وجہ سے یہ صورتحال پیدا ہوئی ہے جبکہ ماضی میں شہر میں ایک ساتھ اتنی اسٹریٹ لائٹس بند نہیں ہوئیں، جن اہم سڑکوں کی اسٹریٹ لائٹس بندہیں ان میں شاہراہ فیصل، ملیر ہالٹ تا سپر ہائی وے، جہانگیر روڈ، راشد منہاس روڈ، شاہراہ نورجہاں، یونیورسٹی روڈ، ایکسپریس وے سمیت لانڈھی کورنگی، ملیر ،گلشن اقبال،فیڈرل بی ایریا، نیو کراچی شامل ہے۔ایک اندازے کے مطابق شہر کے ستر فیصد اسٹریٹ لائٹس بند رہتی ہیں، مرکزی شاہراہوں اور فلائی اوورز پر اندھیروں کے باعث شہری اپنی جان ہتھیلی پر رکھ کر گزرتے ہیں، یہ وہی شاہراہیں ہیں جنہیں اسٹریٹ کرائم میں ملوث افراد کی آماجگاہیں بھی کہا جاتا ہے۔واضح رہے کے ایم سی اور ڈی ایم سیز سے فی پول کے حساب سے بل چارج کیا جاتا ہے، لائٹس بند رہنے سے بجلی کا بل کم نہیں ہو تا۔
