رانا ثنا اللہ اور شہباز شریف کی عدالت میں ملاقات،خیریت دریافت کی
شیئر کریں
مسلم لیگ (ن )کے گرفتار رہنما رانا ثنا اللہ کو جوڈیشل ریمانڈ ختم ہونے پر لاہور کی انسدادِ منشیات کی خصوصی عدالت میں پیش کیا گیا۔اس موقع پر مسلم لیگ نون کے صدر اور قومی اسمبلی میں قائدِ حزبِ اختلاف میاں شہباز شریف نے عدالت کے احاطے میں رانا ثنا اللہ سے ملاقات کی۔شہباز شریف نے گرفتار نون لیگی رہنما رانا ثنا اللہ کو گلے لگایا، ان کے ساتھ کچھ دیر بیٹھ کر گفتگو کی جس کے دوران انہوں نے رانا ثنا کی خیریت دریافت کی اور یہ بھی پوچھا کہ ان کے ساتھ جیل میں کیا سلوک روا رکھا جا رہا ہے ۔اس سے قبل میاں شہباز شریف گرفتار نون لیگی رہنما رانا ثنا اللہ سے اظہارِ یکجہتی کے لیے جوڈیشل کمپلیکس پہنچے تو پولیس نے شہباز شریف کی گاڑی کو اندر جانے کی اجازت نہیں دی۔ اس موقع پر میڈیا سے گفتگو کرتے ہوئے شہباز شریف نے کہا کہ رانا ثنا اللہ میرے پرانے ساتھی ہیں، ان سے ملاقات کرنا میرا جمہوری حق ہے ، انتظامیہ کو 10 سے زائد مرتبہ ان سے جیل میں ملاقات کا کہہ چکا ہوں۔مسلم لیگ نون کے کئی سینئر رہنما بھی میاں شہباز شریف کے ہمراہ موجود تھے ، کمرہ عدالت کے باہر پولیس اور نون لیگی کارکنوں میں دھکم پیل اور تکرار بھی ہوئی۔
