پیٹرول مہنگا،موٹر سائیکل والوں کیلئے 200 2روپے کا اعلان
شیئر کریں
رجسٹرڈ 14 لاکھ موٹرسائیکلوں پر 55 روپے کا بوجھ نہیں پڑنے دیں گے، سہیل آفریدی
پیٹرول میں اضافہ مسترد ، بی آر ٹی کا کرایہ نہیں بڑھائیں گے؛ وزیراعلیٰ کی پریس کانفرنس
وزیراعلیٰ خیبر پختونخواہ سہیل آفریدی کا کہنا ہے کہ صوبائی حکومت پیٹرول میں اضافہ مسترد کرتی ہے، پیٹرول کی مد میں موٹر سائیکل والوں کیلئے 2 ہزار 200 روپے کا اعلان کرتے ہیں، خیبر پختونخواہ حکومت اپنے عوام کے ساتھ کھڑی ہے۔ معاون اطلاعات شفیع جان اور مشیر خزانہ مزمل اسلم کے ساتھ پریس کانفرنس کرتے ہوئے انہوں نے کہا کہ وفاقی حکومت اپنے اخراجات کم نہیں کر رہی، عوام پر پیٹرول بم گرایا ہے، وفاق کو عوام پر بوجھ ڈالنے کے بجائے اپنی شاہ خرچیاں کم کرنی چاہیے، وفاقی وزیرخزانہ کو ہم نے اپنے بقایاجات بتائے، وفاق صوبوں کو اعتماد میں لے یہ اچھی بات ہے، کورونا میں جب ہم نے پیٹرول مہنگا کیا تو یہ لوگ اس پر سیاست کر رہے تھے۔سہیل آفریدی کہتے ہیں کہ پنجاب میں سیلاب آ یا تو ہم نے ان کا ساتھ دیا ہم نے سیاست نہیں کی، کراچی میں گل پلازہ آگ کی لپیٹ میں آیا ہم نے سیاست نہیں کی، نواز شریف کے پلیٹلیس گر گئے اس پر ہم نے سیاست نہیں کی، عمران خان کی صحت کی بات ہے تو یہ اس پر سیاست کر رہے ہیں، حکومت نے خود کہا ہے کہ بانی پی ٹی آئی کی آنکھ کا مسئلہ ہے، مرضی کے مطابق ان کے ڈاکٹرز سے علاج ان کا حق ہے، عمران خان واقعی بیمار ہیں، ان کا علاج ان کی مرضی کے ڈاکٹر سے کروانا ضروری ہے۔وزیر اعلیٰ نے کہا کہ بی آر ٹی کے کرایوں میں بھی اضافہ نہیں کر رہے، حکومت خود خرچہ اٹھائے گی، 140 بی آر ٹی بسوں میں 10 پنک بسیں صرف خواتین کے لیے ہوں گی، کرایہ بھی کم ہوگا، کسانوں کو ریلیف دینے کیلئے بھی جلد اعلان کریں گے، 1 لاکھ 30 ہزار گھرانوں کو سولر سسٹم جون سے پہلے لگا کر دیں گے، وفاق کو تجویز دی کہ خیبر پختونخواہ اسمبلی نے ایک روپے اضافہ بھی تنخواہوں میں نہیں کیا، ہم نے نئی گاڑیوں کی خرید وفروخت پر پابندی لگائی ہے، بین الاقوامی دوروں پر بھی پابندی عائد کی ہے۔انہوں نے کہا کہ ہمارا ہیلی کریش کرگیا لیکن ہم پھر بھی ہیلی کاپٹر نہیں لے رہے، دوسری طرف یہ لوگ اپنے لیے پرائیویٹ جیٹ خرید رہے ہیں، یہ اپنی شاہ خرچیاں کم نہیں کر رہے، عوام پر 55 روپے فی لیٹر پیٹرول کا ایٹم بم گرا رہے ہیں، ہم عوام مخالف پالیسیوں میں کسی کے ساتھ نہیں ہیں، ذخیرہ اندوزی کرنے والوں کے خلاف کارروائی کر رہے ہیں، ڈیش بورڈ بنا رہے ہیں اس سے پتا چلے گا کون ذخیرہ اندوزی کر رہا ہے، جنگ جاری رہی تو پیٹرول کی قلت ہو سکتی ہے۔سہیل آفریدی نے بتایا کہ پشاور میں پانچ ہزار بیڈز کے ہسپتال پر کام جاری ہے، کوہاٹ میں بھی ایک ہزار بیڈز کا ہسپتال بنایا جائے گا، بانی پی ٹی آئی کے وڑن کے مطابق صحت کے شعبے پر خصوصی توجہ ہے، افسوسناک بات ہے کہ وفاق نے ضم اضلاع کے لیے ایک روپیہ تک نہیں دیا، خیبرپختونخواہ حکومت نے اپنی پالیسی کے ذریعے خود کو مستحکم کیا، ہم اپنی عوام کو ریلیف دے سکتے ہیں۔
