سندھ پولیس کوگشت کیلئے دی جانے والی کاریں پراسرار طورپر غائب
شیئر کریں
محکمہ سندھ پولیس کوگشت اور دیگر امور کیلئے چند برسوں کے دوران دی جانے والی درجنوں کاریں پراسرار طورپر غائب کردی گئی ہیں۔کروڑوں روپے مالیت کی سوزوکی کمپنی کی آلٹو کار کے ساتھ راوی گاڑی اور ٹویوٹاکی ایکس ایل آئی کاریں دی گئی تھیں۔ اس ضمن میں ذرائع نے بتایاکہ زیادہ تر کاریں گشت کے بجائے افسران نے اپنے گھروں پر منتقل کرکے گھریلو کاموں کے لیے وقف کررکھا ہے، جبکہ کچھ گاڑیاں خراب ہو کر ورکشاپ اور تھانوں کے کباڑ کا حصہ بن گئی ہیں۔ ذرائع کے مطابق محکمہ سندھ پولیس کو چند سال قبل گشت میں گاڑیوں کی قلت کو دیکھتے ہوئے کروڑوں روپے مالیت کی درجنوں کاریں دی گئیں تھیں جن میں سوزوکی کمپنی کی آلٹو کار،راوی ٹویوٹا اورایکس ایل آئی شامل تھیں۔ ذرائع نے انکشاف کیا کہ محکمے کی جانب سے تھانوں کو دی جانیوالی کاریں چند ماہ علاقہ پولیس کے پاس نظر آئیں اور گشت میں بھی بہتری دیکھی گئی، تاہم رواں برس کے اوائل سے ہی درجنوں گاڑیاں پراسرار طور پر غائب ہوگئی ہیں۔ جبکہ علاقہ پولیس کی جانب سے لا علمی کااظہار کیا جارہا ہے۔ ذرائع نے بتایا کہ پہلے تو گاڑیاں تھانوں کو دی گئی تھیں، بعد ازاں ان گاڑیوں پر افسران نے اپنا قبضہ کرلیا اور اپنے کاموں میں استعمال کرنے لگے۔ اس کے بعد ایک ایک کرکے گاڑیاں غائب ہونا شروع ہوگئیں۔
