اربوں روپے منتقلی کا معاملہ، فالودہ فروش کا اکاؤنٹ منجمدکردیاگیا
شیئر کریں
وفاقی تحقیقاتی ادارے ایف آئی اے نے فالودہ فروش کے اکاؤنٹ میں سوا 2ارب روپے کی منتقلی کا معاملے پر اس کا اکاؤنٹ منجمد کردیا ہے۔ذرائع کے مطابق ایف آئی اے نے اکاؤنٹ کھلوانے اور رقم منتقلی کی الگ الگ تفتیش کا فیصلہ کیا ہے۔ عدالتی جے آئی ٹی اور ایف آئی اے اکاؤنٹ کی الگ الگ تفتیش کرے گی۔اکاؤنٹ کھولنے پر بینک کے 5افسروں کو ایف آئی اے اسٹیٹ بینک سرکل طلب کر لیا گیا ہے جہاں اکاؤنٹ میں رقم منتقلی سے متعلق عدالتی جے آئی ٹی پوچھ گچھ کرے گی۔ذرائع کے مطابق جعلی اکاؤنٹ کھولنے پر بینک افسران کیخلاف مقدمہ درج ہو گا۔
خیال رہے کہ جعلی بینک اکاؤنٹس کے ذریعے منی لانڈرنگ کی تحقیقات کے دوران کراچی میں فالودہ فروش کے اکاؤنٹ میں225 کروڑ کے انکشاف پر ہلچل مچ گئی تھی۔500 روپے یومیہ کمانے والے عبدالقادرکو اتنی بڑی دولت کا ایف آئی اے نے بتایا جس کے بعد سیکورٹی اداروں نے فالودہ فروش کی سیکورٹی بڑھا دی اور گھر کے باہر 4 پولیس اہلکار تعینات کر دیے۔
اورنگی ٹاؤن میں40 گز کے گھر میں رہائش پذیر عبدالقادر نے بتایا اسے تو پتا بھی نہیں کہ کب اس کا اکاؤنٹ کھلا اور رقم کہاں سے آئی؟ اسے ایف آئی اے کے خط کے ذریعے پتا چلا اور پھر اسے طلب بھی کیا گیا۔انہوں نے بتایاکہ سرجانی ٹاؤن میں مکان خریدنے کی غرض سے ایک بینک اکاؤنٹ کھلوایا تھا، لیکن وہ بھی تصویری بینک اکاؤنٹ تھا، اسے جب اپنے اکاؤنٹ میں اتنی بڑی رقم کی موجودگی کا پتا چلا تو اسے کسی قسم کی حیرانی نہیں ہوئی بلکہ وہ تو ریڑھی لے کر فالودہ فروخت کرنے کے لیے چلا گیا تا کہ دیہاڑی لگائی جا سکے۔
عبدالقادر نے بتایا کہ وہ بالکل ان پڑھ اور انگوٹھا چھاپ ہے، اپنا نام بھی نہیں لکھ سکتا، انگلش میں دستخط کیسے کرے گا؟عبدالقادر نے بتایا کہ چند سال قبل گلستان جوہر میں ایک پی سی او پر ملازمت کرتا تھا اور شناختی کارڈ وہاں جمع کرایا جو ملازمت چھوڑنے کے 4روز بعد واپس دیا گیا، اس کی کاپی کب اور کہاں استعمال ہوئی، وہ کچھ نہیں جانتا، ممکن ہے کسی نے کاپی کر کے اکاؤنٹ کھولا ہو۔اس نے بتایا کہ میں میڈیا پر خبریں چلنے سے اور محلے والوں کے سوالوں کا جواب دے دے کر تھک گیا ہوں۔پولیس حکام کے مطابق بے نامی اکاؤنٹ کا کیس جو منی لانڈرنگ کیس میں تبدیل ہو چکا ہے، ممکن ہے یہ اسی طرز کا کیس ہو، جیسے اس سے قبل کمپیوٹر آپریٹر کے اکاؤنٹ میں 8 ارب روپے کا انکشاف ہوا تھا، تاہم ابھی تک اس حوالے سے کوئی حتمی بیان جاری نہیں کیا گیا۔
ذرائع کے مطابق فالودہ فروش کے اکاؤنٹ میں رقم ایک بزنس گروپ نے منتقل کی جس کو تفتیش کے لیے طلب کیا گیا ہے، جبکہ عبدالقادر کے اکاؤنٹ میں 225 کروڑ روپے 2014 اور 2015 میں منتقل ہوئے تھے۔تفتیشی حکام کے مطابق عبدالقادرکا بے نامی اکاؤنٹس کی طرز پر نیا کیس ہے جس کا منی لانڈرنگ سے تعلق نہیں، ایسے اکاؤنٹس مختلف بزنس گروپ ملک کے مختلف حصوں میں ٹیکس بچانے کے لیے کھولتے ہیں، اس نوعیت کے اکاؤنٹس کو ٹریڈ اکاؤنٹس کہا جاتا ہے جس کے نام پر اکاؤنٹ کھلتا ہے، اسے پیسے بھی دیے جاتے ہیں، اس معاملے کی مزید تحقیقات جاری ہیں۔دوسری جانب جے آئی ٹی نے مزید 10 بے نامی اکاؤنٹس کا پتا چلا لیا ہے جس کے بعد منی لانڈرنگ کے لیے استعمال ہونے والے اکاؤنٹس کی تعداد40 ہو گئی ہے جن سے 10 ارب سے زائد رقم منتقل کئے جانے کا انکشاف ہوا ہے۔ذرائع کے مطابق50 ارب روپے کے قریب رقم کی ہیر پھیر کی تفصیلات جمع کی جا چکی ہیں۔
