فواد چودھری کو پیش نہ کرنے پر لاہور ہائیکورٹ میں توہین عدالت کی درخواست دائر
شیئر کریں
عدالتی حکم کے باوجود پاکستان تحریک انصاف کے گرفتار رہنما فواد چودھری کوعدالت پیش نہ کرنے پرلاہور ہائیکورٹ میں توہین عدالت کی درخواست دائر کر دی گئی ہے۔ درخواست میں آئی جی اسلام آباد اور آئی جی پنجاب سمیت 16 پولیس افسران کو فریق بنایا گیا ہے جس میں کہا گیا ہے کہ پولیس افسروں نے عدالتی نظام کا مذاق اڑایا، درخواست میں استدعا کی گئی ہے کہ عدالت ذمہ دار افسروں کے خلاف توہین عدالت کی کارروائی کرے۔ درخواست میں موقف اپنایا گیا ہے کہ 25 جنوری کو ہائی کورٹ نے فواد چودھری کو عدالت پیش کرنے کے احکامات دیے تھے، اسلام آباد پولیس نے عدالتی احکامات کے باوجود انہیں عدالت میں پیش نہیں کیا، احکامات پر عمل نہ کرنا توہین عدالت کے زمرے میں آتا ہے۔ درخواست میں استدعا کی گئی ہے کہ متعلقہ حکام کے خلاف توہین عدالت کی کارروائی کی جائے، عدالت متعلقہ افسران اور حکام کو قرار واقعی سزا دینے کا حکم دے۔
